KNK: Vernîya talankerdene xozayî de bêvengîye, sûcêko pîl o

Komîsyonê Dorûverî yê Kongreya Neteweyî ya Kurdîstanî (KNK) yew eşkerayîye de seba rayaumûmîye, şarê welatperwerî yê Kurdîstanî û pawitoxanê dorûverî, rîyê wêrankarîya xofnake ya dorûverî ra ke hetê dewleta Tirke ra herêmanê sînorî yê Başûrê Kurdîstanî de yena kerdene, yew îqazo tund kerd.

Eşkerayîye de ame dîyarkerdene ke îşxalkerîya Tirke nê tena seba serwet û samanan sînor derbaz kerdo, la bi armancgirewtişê daristanan, birnayîş û vêşnayîşê daran yê dewamkarî û xirabkerdişê ekolojîya Kurdîstanî, yew hewldayîşo sîstematîk seba qirkerdişê dorûverî û rijîyayîşê nasnameyê xozayî yê herême kena.

KNK’î destnîşan kerd ke nê sûcê dorûverî binpaykerdişêko eşkera yê pêro peyman û pîvananê mîyanneteweyîyan o û yew tewirê cîddî û lezabezî rê îhtîyac esto. Peynîya eşkerayîye de, Komîsyonê Dorûverî yê KNK’î panc madeyan ra yew vengdayîş pêşkêşê rayaumûmîye û hetanê eleqedaran kerd û waşt ke her kes wayîrê dorûverê Kurdîstanî vejîyo:

1- Ma veng danê şarê welatperwerî yê Kurdîstanî û dostanê dorûverî ke kura de benê wa bibê, wa vengê nêrazîbîyayîşê xo vera nê sûc û wêrankarîyanê dorûverî berz bikerê û wayîrê xozaya Kurdîstanî vejîyê.

2- Ma rêxistinanê mîyanneteweyîyan yê heqanê merdiman û pawitişê dorûverî ra wazenê ke bêvengîya xo bişiknê û cigêrayîşêko lezabezan serê nê sûcanê dorûverî de bikerê ke herêmanê sînorî û cayanê Kurdîstanî de yenê kerdene.

3- Ma hukmatê Herêma Kurdîstanî û hetanê sîyasîyan ra wazenê ke wayîrê tewirêkê neteweyî û zelalî (aşkereyî) bê vera nê îşxal û talankarîya dorûverî û vera çînkerdişê keskewe û xozaya welatî mebê hemkar (şirîk) yan zî bêveng.

4- Ganî dezgehê çapemenîye û rojnamegerî zêdêr bala xo bidê dosyaya qirkerdişê dorûverî yê Kurdîstanî ser û sûcanê vêşnayîş û birnayîşê daran dinya (cîhan) rê bidê naskerdene.

5- Pawitişê daristan û dorûverê Kurdîstanî wezîfeyêko exlaqî û neteweyî yê her yew ferdî yo, coka ganî bi her qayde û bi rayîrê çalakîyanê medenîyan vernîya nê xirabkerdişê sîstematîkî bêro girewtene.