KNK: Hêrişê vera şarê Serêkanîyê plankerde yo

Konseya Rayraberdişî ya Kongreya Neteweyî ya Kurdîstanî (KNK) derheqê hêrişê grûbêka çekdare ya vera keyeyanê Serêkanîyê ke agêrayî welatê xo, eşkerayîye daye.

Eşkerayîye de ame vîrardene ke agêrayîşê koçberan çarçewaya peymana 29ê çeleyî ya mabênê Îdareyo Xoser û hukmatê demkî yê Şamî de qewimîya: "Wexto ke 410 keyeyê kurdan resayî Serêkanîyê, hetê tayê hêzanê çekdaran ê hetgirê HTŞyî ra bi kerra, dar û çekan ameyî hêrişkerdene. Xeylê kesî birîndar bîy û zerarêko madî û cîdî virazîya. No hêriş tesaduf nîyo; bi zanayîş û qebulê selahîyetdaranê Şamî, plankerde û organîze qewimîya.

Goreyê peymana bi Şamî, hukmatê demkî mecbûr bî ke mal û milkê koçberan bipawo, keye û karmarê înan wayîranê ci rê peyser bido û êyê ke cayîyê şaristanî nîyê, şaristanî ra bikero dûrî. Hukmatê Şamî pêdîyayîşê xo yê peyênî yê bi Sekreterê Pêroyî yê Neteweyê Yewbîyaye Antonio Guterresî de zî teyîd kerdbî ke o do rêz bigîro heqanê merdiman û huqûqê mîyanneteweyî."

KNKyî vat nakokîya mabênê vatiş û kerdişê rejîmê Şamî bi nê hêrişanê peyênan reyna vejîya meydan: "Ganî Neteweyê Yewbîyaye bilezabez mudaxele bikerê, hukmatê Şamî hişyar bikerê û seba çareserîya nê problemî bikewê dewre. Ganî UNHCR seba şarê Serêkanîyê û heme koçberan agêrayîşêko bêrîsk bigîro binê temînatî."

Konseya Rayraberdişî ya KNKyî bi nê wesîleyî venga hukmatê demkî yê Şamî da ke teahudanê xo bîyaro ca û hêrişanê hêzanê çekdaran ê vera kurdan bilezabez bivindarno.

Eşkerayîye wina qedîyaye: "KNK hêrişê Serêkanîyê û hêrişkerdoxan bi hêrs şermezar keno; venga heme dezgehanê kurdîstanijan û şarê kurdî dano ke seba piştîdayîşê şarê Serêkanîyê vengê xo berz bikerê û bi her hewayî wayîrê koçberan û heme şarê Rojawanî bivejîyê."