Kesê ke têkoşînê azadîye de şehîd bîyê, yenê vîrardene

Seba kesê ke tarîxanê cîya-cîyayan de têkoşînê azadîya kurdan de şehîd bîyê, xeylêk şaristananê Kurdîstan û Tirkîya de vîrardişî dewam kenê.

MÊRSÎN

Serekîya Komeleya Yewbîyayîş, Piştgirî, Ardim û Kulturî ya Keyeyanê Ke Merdimanê Xo Vîndî Kerdê ya Landa Şaristanîyan Mêrsînî (MEBYA-DER) de, qezaya Akdenîzî de Mehelaya Guneşî de Keyeyê Şînî yê Guneşî de kesê ke têkoşînê azadîye de şehîd bîyê yenê vîrardene.

Keyeyê şînî rê pankartê “Şehîdên me rûmeta me ne”, “Em şehîdên azadiyê bi bîr tînin” û “Şehîd namirin” ameyî daliqnayene. Maseyanê ke seba vîrardişî ameyê amadekerdene ser o flamayê zer, sûr û keskî û fotografê kesê ke şehîd bîyê û Rayberê Şarê Kurdî Abdullah Ocalanî û qerenfîlê sûrî ameyî ronayene.

Vîrardiş, bi slogananê “Şehîd namirin” dest pêkerd.

EDENE

Serekîya Komeleya Ardim û Piştgirîya bi Keyeyanê Ke Merdimanê Xo Vîndî Kerdê ya Adana Akdenîz (AKKAY-DER) de, qezaya Seyhanî de Mehelaya Ova de Keyeyê Şînî yê Ova de vîrardiş yeno organîzekerdene.

Cayo ke vîrardiş tede yeno viraştene rê pankartê “Şehîdên me rûmeta me ne”, “Em şehîdên azadiyê bi bîr tînin” û “Şehîd namirin” û posterêko gird ê Rayberê Şarê Kurdî Abdullah Ocalanî ameyî daliqnayene. Maseyanê ke seba vîrardişî ameyê amadekerdene ser o reyde flamayê zer, sûr û keskî, fotografê kesê ke canê xo dayê û fotografê Abdullah Ocalanî û qerenfîlî ameyî ronayene. Vîrardiş, bi kewtişê keyeyanê kesê ke têkoşînê azadîye de şehîd bîyî yê mîyanê warî bi slogananê “Şehîd namirin” dest pêkerd. Vîrardiş de tim û tim slogana "Şehîd namirin" ameye eştene.

Vîrardişo ke bi rêzgirewtiş dest pêkerd de, şarî keyeyî zîyaret kerdî û serweşîye waşte.

HATAY

Qezaya Dortyolî ya Hatayî de seba Hesen Bindalo (Edîp Sirça) ke têkoşînê azadîye de şehîd bibî, keyeyê ci de şîn ame ronayene. Şînî rê keye û merdimê Hesen Bindalî, temsîlkarê partîyanê sîyasîyan û rêxistinanê komelê sivîlî tewr bîyî.