KCK: Têkoşînê seba Rayber Apoyî û yewîya neteweyîye, wayîrvejîyayîşê mîrasê Mam Celalî yo
KCK seba serrgêraya mergî ya Celal Talebanîyî eşkerayêk da û eşkera de wina vat, “Serrgêra 9. ya koçê ey ê peyênî de, ma verê vîrardişê Serek Mam Celalî de bi hurmet sereyê xo anê war; ma sondê xo newe kenê ke têkoşînê azadîwazîya Kurdîstanî de, ma do wayîrê armancanê ey ê aştîwazan bivejîyê.”
Hemserekayîya Konseya Rayberdişî ya Koma Komelanê Kurdîstanî (KCK), bi wesîleya serrgêra koçê peyênî yê ronayoxê Yekîtîya Nîştimanîya Kurdîstanî (YNK) û serekkomarê Kurdo yewin yê Iraqî Mam Celal Talebanîyî, eşkerayêke weşanaye.
Eşkeraya KCK’yî wina ya:
“Ewro 9 serrî ser o koçê peyênî yê Serek Mam Celal Talebanîyî ra derbas benê ke o ronayoxê YNK û serekkomarê kurdo yewin yê Komara Federala Iraqî bi.
Serek Mam Celal Talebanî sey roşnvîr, şoreşgêr, pêşmerge, fermandar û sîyasetmedarêko zana, mora xo daye tarîxê 50 serran ê xebate û têkoşînê azadîya Kurdîstanî. Qonaxanê têkoşînê neteweyî de destkewteyê pîlî mîsoger kerdî. Xebata ey tenya bi Başûrî sînordar nêmende; qada sîyasî û dîplomasîye de perçeyanê bînan de zî bîyo pêşengê çareserî û aştîye. O mabênê Rayber Abdullah Ocalan û Turgut Ozalî de bîyo mîyankar. Verî ke serra 2012î de nêweş bikewo, seba azadîya Rayber Ocalanî amadekarîya ‘Projeyê Mandela’ kerde.
Ewro ke 33 serran ra dima reyna mabênê dewlet û Rayber Apoyî de dîyalog esto, seba serkewtişê nê ravêrî îhtîyacîya ma bi tecrubeyê Serek Mam Celalî esta. Coka têkoşînê azadîya Rayber Ocalanî, eynî wextî de wayîrvejîyayîşê mîrasê Mam Celalî yo. Serrgêra 9. de ma verê vîrardişê ey de sereyê xo anê war û sond wenenê ke do wayîrê mîrasê neteweyî bivejîyê.”
