KCK: Serra 29. ya komployî de ma têkoşîn berz bikerê û Rayber Apo azad bikerê
KCK’yî serrgêra 29. Komployo ser o eşkerayêk da û vat, "Serra 29. ya komployî de wezîfeyê ma yo ke ma her qad de têkoşîn berz bikerê, Rayber Apo û şarê Kurdî azad bikerê. Serra 29. şarê Kurdî, dostanê ci û hêzanê demokrasî rê veng dana ke têkoşîn berz bikerê."
Hemserekîya Konseya Rayberdişî ya KCK’yî serrgêra 29. Komployo ser o eşkerayêk da û vat, "Ma pêro hêzanê sîyasîyî yê ke mîyanê komployê mîyanneteweyî yê vera Rayber Apoyî de ca girewto, bi şîdet şermezar kenê. Ma şehîdanê xoverdayîşê ‘Şima Nêeşkenê Roja Ma Tarî Bikerê’ yê ke vera nê komployî adir ra barîkatî viraştî, bi minnet û hûrmet yad kenê."
Dewamê eşkerayîye de nê çîyî zî ameyî vatene: "Komplogêranê mîyanneteweyîyan waşt Rayber Apoyî tasfiye bikerê. Çunke Rayber Apo waştêne qederê Rojhilatê Mîyanênî yo ke seserranê peyênan de mîyanê tarîtîye de yo, bivirno. Rayber Apo polîtîkaya çareserkerdişê meseleya kurdî ya ke serê esasê wayûbirayîya şaran û demokrasî de ya, meşnayêne. Têkoşînê nê hetî, welatanê ke Kurdistan binê desthilatdarîya xo de girewto, averşîyayîşê muhîmî kerdêne. Na rewşe, kesê ke wazenê Kurdistanî 4 parçe bikerê û hegemonyaya xo Rojhilatê Mîyanênî de bidomnê, tirsanayî. Têgêrayîşê Azadîye yo ke binê serekîya Rayber Apoyî de yo, hegemonyaya hêzanê mîyanneteweyîyan rê bî xetereyêka pîle û no komployo ke dinya de mîsalê ci nêasayo, fîya dewre."
Eşkerayîya KCKyî de nê xusûsî zî ameyî îfadekerdene: "Bi nê komployî waştî ke bandora Rayber Apoyî bişiknê. Waştî ey fîzîkî yan zî îdeolojîk-sîyasî bêbandor bikerê. La kesayetê xoverdayîşê şarî de raştê xoverdayîşêko xurt ameyî. No bîyo destpêkê binkewtişê komployî. Rayber Apo Zîndanê Îmraliyî de têkoşîn resna astêka îdeolojîk û polîtîk. Tevger û şarê ma bi Raybertîye re bîyî yew û komplo pûç kerd. Ewro kurdî bîyê hêzêko pîl o ke nêno înkarkerdene. Rayber Apo Pawitişnameyê DMME’yî de vato: 'Komployê tarîxî nêeşkenê verê averşîyayîşî bigêrê, lez kenê.' Bêguman esaretê Rayber Apoyî hema zî dewam keno. La Rayber Apo hemleyêka îdeolojîk-teorîke awan kerde û rayîrê xelisîyayîşê merdimeyîye mojna ra. Ewro Manîfestoyê Komelê Demokratîkî derbêka girane daya sîstemê modernîteya kapîtalîste ro. Sosyalîzmê demokratîkî do bi paradîgmaya azadîya cinîyan, ekolojîk û komelê demokratîkî berz bibo.
Manîfestoyê Komelê Demokratîkî yê Rayber Apoyî nê tenya yê kurdan, esasê têkoşînê cuye ya azade ya pêro merdimeyîye yo. Komployê mîyanneteweyî şexsê kurdan de vera pêro şaranê Rojhilatê Mîyanênî ameyo kerdene. Rayber Apo bi paradîgmaya azadîya cinîyan, ekolojîk û komelê demokratîkî û bi projeyê aştîye wazeno komployî bi temamî betal bikero.
Aştîye û Komelo Demokratîk bi azadîya Rayber Apo û şarê Kurdî do tacîdar bibê. Serra 29. de wezîfeyê ma yo ke ma her qad de têkoşînî xurt bikerê. Şarê ma yo ke serrgêra komployî de têkoşînî berz keno, do komplogêran bierşawo goristanê xirabîyan yê tarîxî."
