KCK: Ma do rêça şehîdanê xo de şirê

Hemserekîya Konseya Rayberdişî ya KCKyî vat: ''Şehdatê ke rîyê şertanê giranan ê şerrî ra nêameyî eşkerakerdene, yenê îlankerdene. Ma nê heme şehîdanê xo bi hurmet û mînetî yad kenê, keyeyanê înan û şarê Kurdîstanî rê serweşîye wazenê. Ma do heseretê înan ê cuya azade û demokratîke miheqeq bîyarê ca.''

Eşkerayîye de ame vatene ke îlanê şehadetan wextê Prosesê Haştîye û Komelê Demokratîkî de yenê îlankerdene û nê ameyî vatene: ''Şarê ma wayîrê şehîdanê xo vejîyeno. Tewrbîyayîşê yadkerdişan sixletî vîyarenê. No zî mojneno ke şar wayîrê prosesê haştîye û komelê demokratîkî zî vejîyeno. Senî ke keyeyê şehîdêkî vat şaro ke wayîrê şehîdanê xo vejîyeno do miheqeq bibo azad. Qet çew nêeşkeno verê têkoşînê azadîye yê nê şarî de vindero.''

Eşkerayîya KCKyî de ca dîya nê xususan:

''Wextê Hemleya 15ê Tebaxe ya 1984î ra heta ewroyî bi hezaran gerîlayî şehîd bîyî. Şehdatê înan şarê kurdî newe ra ganî kerd. Ewro şarê kurdî sereberz payra yo. Şarê kurdî ke gangeş de bi,  bi têkoşênê azadîye  ke serkêşîya ci Rayber Apoyî keno, ewro Rojhelatê Mîyanênî de bîyo şaro tewr dînamîk. Şarê kurdî çar parçeyanê Kurdîstanî de xeyrê şehîdan heta ewroyî ame. Şarê ma na raştîye zano coka şehîdanê xo bimbarek vîneno û wayîrê ci vejîyeno.  Rayber Apoyî vat, PKK partîya şehîdan a. Şarê kurdî zî şarê şehîdan o.

Têkoşînê azadîyeyê şarê kurdî 53 serrî bêmabên dewam keno. No bi keda gerîlayan bi ke hêzo fedayî yê Rayber Apoyî yo. Bi têkoşînê azadîye Kurdîstan de bedilnayîş girdî ameyî afirnayene û erjê  girdî vejîyayî werte. Şarê kurdî netîceya nê têkoşînê bêmabênî de heta ewroyî ame. Şarê ma bi wayîrêvejîyayîşê şehîdanê xo wayîrê ameyoxê xo yê azadî vejîyeno.

Gerîla artêşa ciwanan a. Ganî ciwanî ewro her ca de tewrê têkoşînê azadîye bibê û Têgêrayîşê Azadîye her ca de xurtêr bikerê. Ciwanî senî vizêr hêzo esasî yê têkoşînê gerîlayan bî, ewro zî ganî bibê hêzê têkoşînî. Çunke tim netîceya têkoşînê rolê ciwanan bewlî keno.  Ciwanê ke tewrê yadkerdişê şehîdan benê, mojnenê ke do rolê xo bîyarê ca.

Eke ewro herinda stratejîya têkoşînê çekdarî de  stratejîya têkoşînê sîyasîyî vejîyena werte, no zî bi keda şehîdan o. Têkoşînê 53 serran prosesê komelê demokratîkî daye destpêkerdene. No prses nê di serran de nêvejîya meydan. Kam ke wina bifikiryo xelet o. Rayber Apoyî bi tecrubeyê têkoşînê 53 serran nê prosesî rayîra beno. Têkoşînê komelê demokratîkî do xeta azadîye ser bikewo.Wayîrvejîyayîşê şehîdanê ma nê mojneno.

Ma do rêça şehîdanê xo de şirê, ma sozê xo yê şarê xo do biresnê cuya azade û demokratîke, newe kenê; veng danê şerê xo ke wa rêça şehîdan de xoberdayîş bêro xurtkerdene.''