Karayilan: Rîyê şertanê şerî ra ma nêeşkayî şehadetan wextê ci de eşkera bikerê

Endamê Fermandarîya Merkezê Pawitişê Şarî Murat Karayilanî  ke cewab da persanê ANFyî, şehadetê peyênî ke ameyî eşkerakerdene û tezayîyê girseyî ke xeylê bajaranê Kurdîstanî de yenê kerdene, erjnayî.

Karayilanî sere de şehîdî bihurmet yad kerdî, sozê serkewtişî newe kerd û vat, ''Ez bi nameyê heme îdareyê qerargah û têgêrayîşê ma keyeyanê heme şehîdanê ma yê erjîyayeyan rê serweşîye wazena. Sereyê heme keyeyan, heme kurdan weş bo. Bitaybetî ez dayîkanê erjîyayeyan selam kena û lew nana destê înan ro  ke nê ewladê kurdî yê qehremanî pîl kerdî. ''

Karayilanî bale ante vîradişanê ke Amed, Îstanbul, Wan, Gever, Cizr, Botan û Nisêbîn de seba 230 şehîdan ameyî kerdene ser û vat tewrbîyayîşo girseyî mojneno ke komelê kurdan senî wayîrê şehîdan ê erjanê xo vejîyeno.

Karayilanî îfade kerd ke rîyê şertanê şerê giranî û sebabênê asayîşî ra tay şehadetî erey resayî qerargahî û vat şehadetê ke hema nêameyî eşkerakerdene zî est ê.  Karayilanî vat Vakurê Kurdîstanî de he 520 û parçeyanê bînan Kurdîstanî de zî hûmara dahîna tay şehîdê ke hema nameyê înan nêameyî eşkerakerdene est ê û îfade kerd ê do hewteyan û aşmanê verê ma de nameyê nê pêrune eşkera bikerê.

Karayîlanî raya verêne derheqê hûmara şehîdan de doneyê hîrayî dayî û vat 1976î ra heta 2026,  25 hezar û 922 şehîdî ameyî qeykerdene, pîya bi înanê ke nêameyî qeydkerdene re hûmere resaye nizdê 27 hezarî. Karayilanî vat şehîdê ke demê peyênî de ameyî eşkerakerdene teberê yew di kesan de hema hema pêro cenazayî binê kontrolê înan de yê û seba ke nê şehîdgeh de bêrê têhet xebatê înan dewam kenê.

Karayilanî metodê têkoşînê ke do prosesê Haştîye û Komelê Demokraîtî de bêrê şuxulnayene zî erjnayî û vat,''Ma merhaleya şerê çekdarî ra vîyarenê merhaleya têkoşînê sîyasî û komelkî. Ma stratejîya şerê çekdarî caverda la ma têkoşîn canêverda. Dewrê neweyî de sîyaseto demokratîk û rêxistînîya komelkî do bêro xurtkerdene.''

Karayilanî wina dewam kerd: ''Sekê yeno zanayene ma merhaleya tarîxî de yê ke krîtîk û muhîm a. Ma wazenê metodê têkoşînê xo bibedilnê. Nê demî de ganî her kes hîşar bo. Ganî ma wayîrê dewaya şehîdan bivejê û erjê ke şehîdan afirnayî, bikerê bingeyî prosesê neweyî. 53 serrî yo ma têkoşîn rayra benê. 41 serrî ma şero çekdar rayra berd. Nê 41 serran de adirbirnayîş ameyî kerdene; nê pêro 11 serrî yê. Yanî şer 30 serrî ame rayraberdene. Şerêko zaf zor destankî ame rayraberdene. Bi keda Rayber Apoyî payra mend ame averberdene.

Ewro wezîfeyê ma yo ke ma bedilnayîşê stratejîkî bi berpirsîyarîye bîyarê ca û ser bifinê. Rayber Apoyî qey nê bedilnayîşî ardî rojdemê ma? Çunke naye ra bawer keno; ma zî sero cigêrayîş kenê û pê bawer kenê. Şerê çekdarî rolê xo kay kerd. Ewroyî tepîya ma do bi metodanê sîyasîyan, çarçewaya huqûqî de têkoşînî rayra bêrê û ser bikewê. Waştişê ma hedefo bimbarek û gird o. No têna waştişê prosesêkî nîyo; ma wazenê seba merdimîye bedilnayîşêk biafirnê.

Ganî ma prosesî raşt fam bikerê, gamanê xo bitedbîr bierzê. Ganî ma hîşyar bê, beno ke verê ma de kayî est ê. Coka ganî ma hesabê her çî bikerê û goreyê ci gaman bierzê.  Nê dewrê neweyî de zî qehremanê ma seba ma do reyna bibê serkêşê bêmergî  û çimeyê hêzî. Na çarçewa de ez pêrune rê serkewtiş wazena û reyna vana Şehit Namirin, Şehit Namirin.''