Îstîxbaratê tirk, rûs û HTŞ’yî Laziqîye de ameyî têhet
Laziqîye de yew kombîyayîşo nimite ke îstîxbaratê tirk, rûs û HTŞ’yî tewrê ci bîyî de, qerar ame girewtene ke Sûrîye ra xeylê çeteyê xerîbî bişawîyê Yemen û Afrîka.
Sûrîye ke tede hema heme kerrî nêrûniştê de, fealîyetê leşkerî û îstîxbaratî yê hêzanê herêmkî û hegemonan dewam kenê. Goreyê malumatê ke lekolin.orgî bawerpêkerdeyan ra girewtê, 24ê temmuza 2026î de Laziqîye de, nêzdîyê Zanîngehê Tîşrînî mewqîyê "Yahud"î de bi tewrbîyayîşê temsîlkaranê leşkerîyan yê rûsan, selahîyetdaranê îstîxbaratê tirkan û endamanê îstîxbaratî yê ke girêdayeyê HTŞ’yî yê, yew kombîyayîş ame viraştene. Kombîyayîş de derheqê çeteyanê xerîban yê Sûrîye de babetê cîya-cîyayî ameyî ercnayene.
No mewqî verê cû yew tesîso leşkerî yê hêzanê deryayî yê rejîmê Baasî bi. Rijişê rejîmî ra dima hetê HTŞ û îstîxbaratê tirkan ra ame destvistene û bî yew merkezêko ke tede kombîyayîşê muhîmî yenê kerdene.
Goreyê malumato ke ame destvistene ra, rojeva sereke ya kombîyayîşî waştişê Erebistanê Siûdî bî: “Çeteyê xerîbî yê Sûrîye verî bierşawîyê herranê Siûdî, dima zî seba ke vera husîyan de şer bikerê bierşawîyê Yemen. Her yew çeteyo ke tewrê nê wezîfeyî bibo rê mengane 2.400 dolarî do bidîyê.”
Ame vatene ke waştişê Siûdî bi koordînasyonê DYA û Îsraîlî ameyo, Tirkîya û Rûsya zî destûr dayo. Nê serûberkerdişî pêro kombîyayîşê Laziqîye de ameyî nîqaşkerdene.
Ame zanayene ke eynî wext de çend keştîyê şerî yê tirkan resayê Laziqîye û gruba verêne kirişta herêma Asîrî ya Erebistanê Siûdî. Na gruba verêne 1.782 kesan ra ameyêne pê. Qismo pîl (zêde) yê înan çeteyanê DAIŞ’î yê xerîban yê koka xo çeçen, ozbek û fransizî ra pê ameyêne, mîyanê înan de çeteyê DAIŞ’î yê koka xo Sûrîye, Îdlîb, Heleb û Hama ra zî estbîyî.
Karê kiriştişî tenya bi yew grube sînordar nêmaneno. Ame îfadekerdene ke çarçewaya eynî planî de grubê neweyî zî amade benê û erşawîyenê. No zî mojneno ra ke Sûrîye ra herêmanê bînan rê erşawitişê çeteyan dewam keno.
Bi hawayêko paralel ame vatene ke Tirkîya mîyanê yew hewldayîşî de ya ke qismêkê çeteyanê xerîban yê Sûrîye erbişawa welatanê Afrîka. Nê çeteyî do tewrê operasyonanê ke do xizmetê menfaetanê Tirkîya yê herême bikerê bibê û miqabilê ci de zî kes sero do mengane 2.000 dolaran bîgêrê.
Polîtîkaya herêmkî ya Tirkîya eynî wext de ronayîşê têkilîya bi hetanê muxalîfan ser o ya. Yew het ra vera Îsraîlî de paştî dana Hîzbullahî, hetê bînî ra Yemen de vera husîyan de têkoşîn de Erebistanê Siûdî reyde hemkarîye kena.
Bi nê nêzdbîyayîşî dewleta Tirke hedef kena ke nakokîyê mîyanê hêzanê ke pê danê ra îstîfade bikero û destkewteyanê sîyasî, îstîxbaratî û leşkerîyan bîgêro dest. Enqera hewl dana ke zêdeyê yew hetî de hereket bikera, menfaetanê hetanê cîya-cîyayan ra îstîfade bikera û herême de nifuzê xo zêde bikera.
Yeno zanayene ke polîtîkaya dewleta Tirke “manevra û têkilîyanê zafhetîyan” ser o ronîyaya. Çeteyê xerîbî pêrodayîşanê teberê Sûrîye de yenê xebitnayene û xizmetê menfaetanê Enqere yê sîyasî, leşkerî û îstîxbaratîyan kenê.
