Îspanya de adirê daristanî de hûmara merdeyan resaye 12
Herêma Endulusî ya Îspanya de adirê daristanî de hûmara kesanê ke weşîya xo vînî kerda resaye 12. Rayedaran eşkera kerd ke tayê qurbanî mîyanê wesayîtanê veşayeyan de dîyayî; bi seyan adirhewnakerî seba ke adirî bîgêrê binê kontrolî xebatanê xo domnenê.
Başûrê Îspanya de Herêma Xosere ya Endulusî de nêzdîyê Almeria de şanê pancşemeyî adirê daristanî vejîya û hûmara kesanê ke nê adirî de weşîya xo vînî kerda resaye 12.
Servîsê Rewşa Lezbeze yê Endulusî verê cû eşkera kerdbi ke qezaya Los Gallardosî de şeş kesan weşîya xo vînî kerda. Pê agahdarîya peyêne ame eşkerakerdene ke hûmara merdeyan resaye 12. Rayedaran da zanayene ke tayê qurbanan wexto ke waştêne adirî ra biremê mîyanê wesayîtanê xo de weşîya xo vînî kerda.
Adirî ra xeylê mehelleyî ameyî tehlîyekerdene, di kesî – yew weşayîş ra yewo bîn zî dumanê giranî ra - berdî nêweşxane. Seba mudaxeleyê adirî nêzdîyê 150 adirhewnakerî, panc tankerê awe û xeylê ekîbî wezîfe kenê û pawîyeno ke Yewîya Rewşa Lezbeze ya Leşkerîye ya Îspanya (UME) zî bêro sewqkerdene bi herême. Seba pêlê germayî yo ke seranserê Îspanya de tesîrê xo domneno, xeylê cayanê Endulusî de nê rojanê peyênan de alarmo porteqalî îlan bibi. Rayedarî hişyarîya xo domnenê ke germo zaf rîskê adirî zêde keno.
