Îranî Silêmanî de qetlîam kerd

Amerîka bombarvarankerdişê Îranî rê dewam kena, Îranî zî hêzanê Kurdîstanê Rojhelatî rê hêriş kerd. Serekê Qerargehê Merkezî yê Hatemul-Enbîya yê Îranî yo ke Surîye rê zî hêrişêko surprîz kerd, Albay Îbrahîm Zulfîkarî tehdît kerd ke eke binesazîye (binawanî) bêra hedefgirewtene, çi yo ke payra mendo do bêro pelixnayene û tu şop do nêmano.

Amerîka 16ê Temmuze de hêrişê xo yê vera Îranî domnayî. Ehwaz, Buşehr, Bender Ebas, Girawa Keşmî, tayê pirî û meydanê teyaregehî cayê ke ameyî pirodayene ra yê. Îranî verpersdayîş de surprîz kerd û herêma Et-Tanfî ya Surîye de tesîsê Amerîka dayî piro. Îranî eşkera kerd ke înan tesîsê Amerîka yê Kuweytî û pergalê radarî yê Amerîka yê Ummanî zî kerdî hedef. Silêmanî de hêzanê Rojhelatî yê Zirguwêzî, Hewlêr û Helebce rê zî dronî ameyî eştene, tayê înan hewa de ameyî îmhakerdene.

8 pêşmergeyî ameyî qetilkerdene

Ame eşkerakerdene ke Pasdaranê Şoreşî yê Îranî hêrişê baregehê Komeleya Zehmetkêşan ya Kurdistanê-Îranî (Komele) yê şaristanê Silêmanî yê Kurdîstanê Federeyî kerdo, 8 pêşmergeyan weşîya xo vîndî kerda. Endamê Polîtburo û Serekê Komîsyonê Îdarî yê Komele Ebdulla Azerbarî derheqê hêrişî de zanayîş da. 

Ebdulla Azerbarî da zanayene ke 17ê Temuze de saetanê sibayî de 6 fuzeyî eştî Baregehê Zirguwêzî. Ebdulla Azerbarî vat ke hêriş wexto ke pêşmergeyî wezîfe ser o bîyî merkezê Komele rê ameyo viraştene, 8 pêşmergeyan weşîya xo vîndî kerda û tayê pêşmergeyî zî birîndar bîyê. Goreyê xebera RojNewsî rewşa di pêşmergeyanê birîndaran girana. Hewlêr rê zî dronî ameyî eştene.

Restî 'Şop nêmanena'

Eşkerayîya CENTCOM’î yo ke nameyê Amerîka ra şerî koordîne keno de nê ameyî vatene: "Hêzanê Amerîka yê ke teyareyanê şerî, wesayîtanê hewayî yê bêmerdimîyan (dronan) û gemîyanê şerî ra pêk yenê; seba pirodayîşê desan hedefanê leşkerîyan ê Îranî yê sey moqîyê goşdarîya qeraxî û pawitişê hewayî, binesazîya leşkerîya lojîstîkî û qabîlîyetanê deryayî, muhîmatê (cepaneyê) hesasî xebitnayî. Na bîya şewa şeşine ya hêrişanê Amerîka ke peyapey vera Îranî de viraştî."

Serekê Qerargehê Merkezî yê Hatemul-Enbîya yê ke Îran de şerî koordîne keno Albay Îbrahîm Zulfîkarîyî vat: "Ma do destur nêdê ke Amerîka midaxeleyê Tengava Hurmuzî bikera. Na, xeta sura Îranî ya ke meşrûbîyayîşê ci mumkun nîyo."

Goreyê xebera Îrna, Zulfîkarîyo ke verpers da tehdîtanê Trumpî nê vatî: "Eke tehdîtê Serekê Amerîka yê wexto peyên ke vatbî do bi rayîrê artêşa Amerîka ya hêrişkar binesazîya Komara Îslamî ya Îranî bêra hedefgirewtene bêrîyê ca, her çiyo ke xêra îtîdalê (sebirê) Îranî ra heta nika payra mendo, yanî heme binesazîyê herême do binê derbanê polayênan ê hêzanê çekdaran ê xurtan ê Komara Îslamî ya Îranî de bêrê pelixnayene; pey de tu şope do nêmana û do wina aso ke qey serî ra qet çin bîyî." Şêwirmendê Rayberê Dînî yê Îranî Mucteba Xamaneyî Mihemed Muxbîrî zî vat ke "Hêrişkerdişê asayîşê Îranî û ziraradayîşê binesazîya ci, yeno manaya bîlêtêkê tek-hetî ke do temamîya zîncîrê tedarîkê enerjîyê herême çin bikero." 

Goreyê îdîaya Jerusalem Postî, Îranî talîmat dayo mîlîsanê Husîyan ke derbazgeyê Deryayo Sur (Bahrê Sur) bigêrê.