Îran ra tehdîdê vilakerdişê şerî

Verfekê Arteşa Îranî Muhammad Ekremî Nîya, tewrê yew merasîmê cenaza bî û derheqê hêrişanê peyênan ê DYA (Amerîka) de eşkerayîye daye. Nîyayî bal ant stratejîya qerarîye ya Îranî ya seba kontrolkerdişê Tengava Hurmizî ser û vat, "Ma do heta peynî xover bidê û verê mudaxeleyanê Amerîka yê mintiqa bigêrê."

Ekremî Nîyayî vat ke amerîkayijî fikirîyenê ke bi hêrişkerdişê tayê baregehanê qeraxanê verojî yê welatî, ê eşkênê na tengava stratejîke kontrol bikerê, la Komara Îslamî ya Îranî wayîrê a kapasîte ya ke eşkena Tengava Hurmizî her nuqta û her cayê welatî ra kontrol bikera. Nîyayî kerd îlawe ke nê meselayî ra eleqeyê qerax û girawan qet çin o.

Goreyê xebere ke ajansê resmî yê Îranî IRNA de weşanîyaya; Ekremî Nîyayî vat ke welatê ke destûr danê Amerîka baregehan ronîya, nika warê tîcaret û asayîşî de bedelanê giranan danê û vat: "Asayîşo ke teber ra yeno, nêeşkeno dewam bikero; asayîşo raştikên, tena bi hewldayîşê welatanê mintiqa û bê mudaxeleyê teberî, bi caardişê asayîş û îstîqrarê xo yeno destfînayene."

Ekremî Nîyayî da zanayene ke, "eke dişmen nê kerdanê xo de israr bikero" ê wayîrê şîyan û çimeyan ê ke hema nêxebitnayê.

‘Hêrişê ma do vêrankerdox bê’

Qeregehê Xatem el-Enbîya yê Îranî zî vat, "Eke Washington binesazîya ma bikero hedef, binesazîya mintiqa zî do çin biba."

Zulfîkarî, derheqê hedefgirewtişê binesazîya welatanê mintiqa de vat, "Do erdî reyde yew bibo û qet yew îze nêmano, sey eke sereta ra qet çin bîya do wina bibo."

Verfekê Qeregehê Merkezî yê Xatem el-Enbîya Albay Îbrahîm Zulfîkarî dîyar kerd ke, Amerîka "tewirê xo yê kîbirinî domnena û asayîşê mintiqa xera kena" û vat, "Îran, bi qet yew şert û awayî, nêverdano ke welatêko teberê mintiqa yê sey DYA, Tengava Hurmizî rê mudaxele bikera." Zulfîkarî bal ant ser ke, no seba Îranî "xeta sûre ya ke nêeşkena bêra derbazkerdiş" a.

Zulfîkarîyî DYA zey "dişmeno cahîl" tarîf kerd û vat, "Seba ma wextê destannuştişî yo, wextê peyser-vinderdişî nîyo." Ey da zanayene ke hêrişê ke ê do bikerê "yew derbeya hemanqîymete nîya, derbeyêka serdesta do biba, her wextî ra hîna şîdetin, hîna hîra û hîna vêrankerdox do biba."