Îran de tehlûkeyê dardekerdişê 8 cinîyanê tepişteyanê sîyasîyan esto
Zextê rejîmê Îranî yê serê tepişteyanê sîyasîyan dewam kenê, yeno vatene ke seba caardişê cezaya dardekerdişî ya heşt cinîyanê tepişteyanê sîyasîyan fikarê girsî vejiyayê werte.
Rêxistina Mafanê Merdiman a Dîdebanî, derheqê tehlûkeyê caardişê cezaya dardekerdişî ya heşt cinîyanê tepişteyanê sîyasîyan ê Rojhelatê Kurdîstanî û Îranî de hişyarîyêke vila kerde.
Goreyê eşkerayîye, tehlûkeyê caardişê cezaya dardekerdişî serê heşt cinîyanê tepişteyanê sîyasîyan ê bi nameyê Pexşan Ezîzî, Zara Şehbazteberî, Nesîme Îslamzehî, Meryem Hodawend, Erxewan Felahî û Mehnaz Çardolî de esto.
Ame destnîşankerdiş ke Werîşe Muradî û Bîta Hîmetî ke di cinîyê tepişteyê sîyasîyî yê û verî cezaya înan a dardekerdişî hetê Dadgeha Pêroyî ya Welatî ra amebî betalkerdiş, rena binê tehlûkeyê vetişê eynî cezaye de yê.
Eşkerayîye de ame dîyarkerdiş ke nê heşt tepişteyî Zîndanê Evînî û Zîndanê Merkezî yê Reştî de yenê tepiştene. Nê cinîyî bi tohmetanê sîyasîyan û asayîşî yê sey ‘bexî’ (serwedartişo çekdarî), “muharebe” (şerê vera Homayî) û tohmetanê girêdayeyanê çalakîyanê sîyasîyan, bi cezaya dardekerdişî ameyê têriye. Nê tepişteyan ra hîrê kesî, mîyanê kesanê ke çalakîyanê peyênan de ameyê tepiştene de yê.
Goreyê zanayîşanê rêxistine, wextê cipersayîşê cinîyan de, binpaykerdişê destbendkerdişî ameyê qeydkerdiş; sey bêparbîyayişê heqê pawitişê serbixoyî, nêdîyarîya ravêrê dadgehkerdişî û gurenayîşê zordarîye seba girewtişê îtîrafan.
