Îran de 16 Rojan de tewr tay 58 kesî ameyî dardekerdene
Merkezîyê Heqanê Merdiman ê Îranî (IHRS), bultenê xo yo hefteyî yê binpaykerdişê heqan ê mabenê 23-30ê Temuze weşan kerd. Rapor de ame vatene ke rejîmê Îranî 16 rojan de tewr tay 58 tepişteyî dardê kerdî û hepisxaneyan de heqê merdiman bi giranî ameyî binpaykerdene.
Rapor de ame dayene zanayene ke 28ê Temuze de Îsfehan de Meydanê Alî Hamanî de Abolfazl Sepahi Badjani û Amir Hossein Safari Hosseinabadi verê çimanê şarî de ameyî dardekerdene. Nê di kesî protestoyanê Çeleyê 2026î de ameybî tepîştene. Dewayanê înan de îşkence, zor ra îtîrafkerdiş, astengkerdişê avukatan û binpaykerdişê heqê dariznayîşê adîlî ca girewt. Eynî dewa ra heşt kesê bînî zî hema cezaya dardekerdişî dir rî bi rî de yê û ciwiyayîşê înan tehlûke de yo.
Hepisxaneyê Qêzêlhêsarî de grevê vêşanîye
Hepisxaneyê Qêzêlhêsarî de vêşêrê 1.500 tepişteyan 16 rojî grevê vêşanîye kerd. Rapor da zanayene ke tepişteyan dima ke selahîyetdaranê hepisxaneyî û meqamanê dariznayîşî reyde dîyalog rona, grevê xo da vindernayene. Selahîyetdaran soz da ke cezayê dardekerdişî yê dewayanê tiryakî do bêrê vindernayene û dosyayê mahkuman reyna bêrê ercnayene. Tepişteyan zî da zanayene ke eke no soz nêro caardene û dardekerdişî reyna dest pêkerê, ê do grevê xo rê dewam bikerê.
Rapor ra binpaykerdişê heqan ê bînî
Tepişteyo sîyasî Îsa Çarî rê cezaya dardekerdişî ameya dayene û o koxuşê 37. yê Hepisxaneyê Qêzêlhêsarî de yeno tepîştene. Ahad Şokohianî rê eynî dosya ra hîrê rey cezaya dardekerdişî ameya birnayene. Hepisxaneyê Evînî ra tepışteyo sîyasî Amirhasan Akbari-Monfaredî rê zî cezaya dardekerdişî ameya dayene.
Goreyê datayanê IHRS’yî, Temuza 2026î de 16 rojan de tewr tay 58 mahkumî ameyî dardekerdene. Nê dardekerdişî tewr zaf hepisxaneyanê Qêzêlhêsar, Tebrîz û Adîlabadî de ameyî kerdene. Çunke tayê înfazî resmî nêrê eşkerakerdene, hûmara raştikên hîna berz a. Mîyanê nê kesan de tutê ke binê 18 serran de yê zî estê.
Mahkemeya Berze ya Îranî, cezaya dardekerdişî ya Binyamin Naghdiyî tesdîq kerd. Hêzanê Wezaretê Îstîxbaratî Abadan û Mahşehr de 12 hemwelatijê erebê sunnîyî binê çimî ra girewtî û berdî cayanê nêdîyaran. Hepisxaneyê Dowlatabadî de mahkuma 62 serrîye Neda Badakhsha ke mensuba dîyantê Bahayî ya, nêweşîyanê xo yê giranan rê nêeşkena xizmetê weşîye bigirê. No hal binpaykerdişo giran ê heqê ciwiyayîşî yo.
Vengdayîşê IHRS’yî
IHRS’yî veng da ke wa Neteweyê Yewbîyayeyî (NY), hukumatî û dezgehê heqanê merdiman ê mîyanneteweyî bi lezabez Îran de dardekerdişan bidê vindernayene, tepişteyanê sîyasîyan bipawê, îddîayanê îşkenceyî cigêrayîş bikerê û heqê dariznayîşê adîlî û xizmetê weşîye misoger bikerê.
