Îran de 14 kesî ameyî destbendkerdene
Îranî pêlêka newîye ya destbendkerdişî daye destpêkerdene û şaristananê cîyayan ê Rojhelatê Kurdîstanî de 14 kesî destbend kerdî.
Rêxistina Heqanê Merdiman a Kurdîstanî bale ante tedaya dewleta Îranî ser o ke vera welatîyanê Rojhelatê Kurdîstanî zêde bena. Goreyê raporê neweyi yê rêxistine, hûmara ê kesanê ke roja çarşemeyi (16ê êlule) Urmîye de ameyî destbendkerdene, bîye 5: Mecîd Îbtîhac, Wahîd Şe'banî, Bêhdar Esedî, Saleh Der'ebûbeçîçek û Ferheng Dehqan.
Şino de zî Ehmed Hacîpûr, Ebdulbasit Bapîrî, Soran Bayîzîdî, Rehîm Erşedî, Reza Reşîdnîya û Fexredîn Îbrahîmî (lajê tepişteyê sîyasî Mihedîn Îbrahîmî ke cezaya îdamî girewta) û Mihabad de welatîyêk bi nameyê Hîwa Ebdulahî ameyî destbendkerdene.
Ame vatene ke qewetanê îstîxbaratê Îranî roja pancşemeyi 17ê êlule de bi wesayîtanê sîvîlan hêriş kerd dukananê di esnafan, Muhsîn Esedî (35 serre, pîyê 2 gedeyan) û Yasîr Husênî; esnafî bi îdîaya ke serrgêra qetlkerdişê Jîna Emînî de piştî daya grevî, badê şîdetî ameyî destbendkerdene. Mam Ezîz Qadirî yê Paswê zî hetê îstîxbaratê Pîranşarî ra seba îfadeyî ame vengdayene û eynî wext de qewetanê asayîşî hêriş kerd keyeyê ci ser o û zirar da kelmelanê ci. Bê nînan, kolbero seqizij Arwîn Ezîzî (20) sînorê Hengejalê Bane de bi hêrişê qewetanê çekdaran ê Îranî bi guleyî ke pîzeyê ci gina, bi giranî birîndar bî.
Ame dîyarkerdene ke qewetanê asayîşî derheqê aqûbetê destbendkerdeyan de keyeyî agahdar nêkerdî.
