Înanê ke Qirkerdişê Garî yê Ankara de dinyaya xo bedilnaye, Îzmîr de ameyî yadkerdene

Komeleya Haştîye ya 10ê Teşrîna Peyêne çalakîya ke seba yadkerdişê Qirkerdişê Garê Ankara ke her aşme viraştêne, na rey rîyê qedexeyê çalakîye ra ke bi bahaneyê Zîrweyê Rayberanê NATOyî Anakra de bî, Îzmîr de kerd.

Yadkerdişî de ke verê Abîdeyê 10ê Teşrîna Peyêne ya vera Garê Alsancakî de ame kerdene, nêzdîyan ra teber, rêxistinê komelê sivîlî, sendîkayî û temsîlkarê partîyanê sîyasîyan ca girewt. Çalakîye de pankartê "Vîrkerdiş çin o, efkerdiş çin o" û "Ma do hesab biwazê" ameyî tepiştene û fotografê înan ke ganê xo ra bîyî, ameyî nawitene.

Hemvervatoxê Komeleya Haştîye ya 10ê Teşrîna Peyêne Îshak Kocabiyikî eşkerayîya çapemenî daye. Ey vera vatişê yew saniqî ke celseyê peyênî de waştbî ke poşmanîye ra îstîfade bikero û keyeyan rê serweşî waştbî, reaksîyon da û vat ke poşmanîya raştikêne ganî verê ke qirkerdiş biqewmîyo, bêro mojnayene.

Kocabiyikî prosesê muhakeme rexne kerd, ard vîrî ke 10 serrî yo qirkerdişî de berpirsîyarîya dewlete nêyena eşkerakerdene, û waşt ke dewa bi hewayêko ke heme berpirsyarî bêrê muhakemekerdene, biqedîyo. Ey tekîd kerd ke têkoşînê înan tena seba 104 kesanê ke 10ê teşrîna peyêne de ameyî qirkerdene nîyo, seba ke qirkerdişê winayênî reyna nêqewmîyê û haştîyêka domdare bêro temînkerdene, dewam keno. Kocabiyikî vat: "Çîyo ke ma rê maneno deyn o. Ma qerardar ê ke ê deynî bi têkoşînê edaletî û têkoşînê haştîye bipawê."