Hûsîyan hêrişê artêşa Yemen û Siûdîyî kerd, merdî û birîndarî estê
Hûsîyê Yemenî ke Îran paştî dano ci, hêriş kerd hêzanê hukumatî û hedefanê Erebîstana Siûdîyî ser. Goreyê çimanê leşkerîyan ê Yemenî, nê hêrişan de tewr tay 58 leşkerî merdî, bi desan leşkerî zî birîndar bîyî.
Rayedaranê leşkerîyan da zanayene ke hêriş, kampanê leşkerîyan ê wîlayetanê Marib û Hadramutî ser o ameyo kerdene ke nê wîlayetî sînorê Erebîstana Siûdîyî ra nezdî yê. Rayedaran da zanayene ke no hêriş, dima ke adirbirnayîşê serra 2022yî kewt merîyet, hêrişo tewr giran o ke artêşa Yemenî ser o ameyo kerdene.
Verfekê leşkerî yê Hûsîyan Yahya Serîyî berpirsîyarîya hêrişî girewte xo ser û da zanayene ke operasyon verba cabîyayîşê leşkerî yê hêzanê Yemenî yê bi paştîya Erebîstana Siûdîyî yê wextê peyênî ameyo kerdene.
Serîyî vat: “Ma verba noqtayanê ke yewîyê dişmenî tede zêdîyayê operasyoneko hîra kerd” û da zanayene ke eke alozîye berz biba, ê seba hêrişanê neweyan amade yê.
Hukumato Yemenî yo ke hetê komelê mîyanneteweyî ra yeno naskerdene, no hêriş sey ‘hêrişkarîye’ pênase kerd û da zanayene ke ê do wext û cayê babetî de verpers bidê.
Koalîsyono ke Erebîstana Siûdîyî serkêşîya ci keno zî, Hûsîyî sûcdar kerdî ke hedefanê sivîlan ê herêma Necranî yê serê sînorî ser o bombeyî varnayê.
Koalîsyonî da zanayene ke netîceyê hêrişan de yew domanê 4 serreyî û sivîlê Misir, Yemen û Pakîstanî zî tede 11 kesî birîndar bîyî. Îdareyê Rîyadî da zanayene ke seba pawitişê sivîlan ê do her babet tedbîran bigirê.
