Hûmara teşrîna verêne ya Newaya Jin vejîyaye: "Komplo ra heta muzakere: Sembolê xoverdayîşî"

Rojnameyê Newaya Jin hûmara xo ya teşrîna verêne bi manşetê "Komplo ra heta muzakere: Sembolê xoverdayîşî" weşanaye. Hûmare de komploya 9ê teşrîna verêne ya 1998î ya vera Rayberê Şarê Kurdan Abdullah Ocalanî û şehîdê azadîye yê teşrîna verêne ameyî qiseykerdene. Nê şehîdî şexsê Berîtane (Gulnaz Karataş) de yenê yadkerdene ke serra 1992î de Xakûrk de vera xayînîye û bi hemkarîye xoverdayîş kerd.

Hûmare de nuşteyê Raperîne Munzur ê bi sernameyê "Berîtane, vengê komelê xoverdayoxî yo" ca gêno. Munzure bale ante ser o ke cuye û xoverdayîşê Berîtane têkoşînê azadîya cinî û kurdan de ca girewto. Roza Metîna û Haskare Kirmizigul zî nuşteyanê xo de tazîyeyê şehîdan û yadkerdişê înan ê ke seba şertanê şerî verê cû nêameybî îlankerdene, erjnayî.

Nazane Ustundage nuşteyê xo yê bi sernameyê "Qanûnê çarçewe vejîya. Dima?" de prosesê muzakere erjna. Aye bale ante kêmanîyanê qanûnî, kesanê ke teberê qanûnî de mendê, heqê beşdarîya sîyasetî û statuyê huqûqî yê Rayberê Şarê Kurdî Abdullah Ocalanî ser o. Huqûqnase Ayla Akat Ata zî qanûnê çarçewe hetê huqûqî ra erjna û vat ke seba haştîya daîmî ganî sîstemêko huqûqî bêro awankerdene ke nîzamê demokratîkî û zemînê sîyasetê demokratîkî bin garantî de bigîro.

Avûkat Newroze Uysal nuşteyê xo de tesîrê qanûnê çarçewe yê ser hepisxaneyan û problemê tepişte û mehkûman erjnayî ke seba tatbîqnêbîyayîşê qanûnan ciwîyenê. Uysale bale ante rewşa hepsîyanê nêweşan û kalan ser o.

Pelşîne Tolhildan nuşteyê xo yê bi sernameyê "Têkoşîno afirnayox, vurnayox û yewker" de rêxistinbîyayîşê komelê demokratîkî de rolê cinîyan ard ziwan. Menekşe Kizildere zî rîpelê ekolojî de modelê rêxistinbîyayîşê ekonomîkî yê Kurdîstanî erjna û vat ke bi komun û meclîsan hewcedarîyê herêmkî eşkenê bêrê tesbîtkerdene.

Hûmare de têkoşînê vera şîdetê cinsî yê Fransa zî ca gêno; rojnameyî derheqê "qanûno temamker" de Suzy Rojtman reyde roportaj kerdo. 

Rojname bi temamî newayajin.net ser o yeno wendene.