Hîzbullahê Îraqî xebatê xo yê leşkerîyî dayî vindarnayene
Komanê çekdaran ê hetgiranê Îranî ra Ketayîb Hîzbullahê Îraqî, dima ke leşkerê DYA xo bi temamî Îraq ra peyser antî, eşkera kerd ke înan xebatê xo yê leşkerîyî dayî vindarnayene.
Serekê Ketayîb Hîzbullahî Ahmed el-Hamîdawîyî ferman da şervananê rêxistine ke xebatanê leşkerîyan bidê vindarnayene. La beyanat de ame vatene ke vera 'teyarayanê dişmenî' yê ke sînorê hewayî yê Îraqî binpay kenê, xebatî do dewam bikerê.
No qerar, dima ke leşkerê DYA Baregeha Hewayî ya Hewlêrî ra barkerd û CENTCOM’î eşkera kerd ke mîsyonê leşkerî bi fermî qedîyayo, ame girewtene.
DYA û Îraqî serra 2024î de qerar dabî ke mîsyonê koalîsyonî biqedînê. Pentagonî dîyar kerd ke paştdayîşê îstîxbaratî do dewam bikero. Peyserantişê DYA seba ke dewlete komanê çekdaran bîyara binê kontrolê xo, zey qonaxêka newîye yeno dîyene.
30ê Êlulî de lîderê Şîîyanê Îraqî Muqteda es-Sedrî zî da zanayene ke komê çekdarî yê girêdayeyê ey ameyî tasfîyekerdene. Goreyê eşkerayîye 'Seraya es-Selam' amîye fesixkerdene û 'Artêşa Îmam Mehdî' zî zey yew weqfa sîvîle amîye vurnayene. Ame vatene ke koma 'Lîwa el-Yewm el-Mewûd'î zî ameya fesixkerdene.
