Hîndîstan de protestoyî dewam kenê
Hîndîstan de dima ke persê îmtîhanê/ezmûnî neteweyî ameyî eşkerakerdene, protestoyê girseyîyî dewam kenê. Temsîlkarê têgêrayîşê ciwanan ê ke xo sey “Partîya Şarî ya Qerqasba” (CJP) name kenê, ewro rayedaranê hukmatî reyde yenê pêser. Têgêrayîşî eşkera kerd ke pêvînayîşan ra dima zî çalakîyî do dewam bikerê.
Hîndîstan de protestoyê vera hukmatê Modîyî qonaxêko newe ra derbaz benê. Qerarê pêvînayîşî, dima ke aktîvîst Sonam Wangchukî grevê vêşanîye yê 26 rojan qedêna, ame dîyar kerdene. Verfekê CJP’yî Saurav Dasî vat ke protestoyî nêqedîyenê û ci rê zêde kerd: “Ma hêvî kenê ke hukmat waştişanê şarî rê goş bido. Ma gamêke zî peyser nêerzênê. Hîşyarbîyayîşo raştkin binî ra dest pêkeno.”
Waştişê îstîfayê wezaretî dewam keno
Çalakgerî wazenê ke Wezîrê Perwerdeyî Dharmendra Pradhan wezîfeyî ra bêro girewtene. Protestoyî, aşma gulane de dima ke persê îmtîhanê fakulteya tibî ameyî eşkerakerdene pîl bîyî. Têgêrayîşê CJP’yî yo ke tewr verî medyaya komelkî de seba mîzahî dest pêkerd, bi lez resay mîlyonan û bedilîya protestoyanê girseyîyan. Na hewte polîsan pê gaza çim-veşnayoxe û copan mudaxeleyê çalakgeran kerd. Şewa çarşemeyî paytext Delhî de pêkewtişî vejîyayî.
Delhî de vergirewtişê asayîşî zêde bîyî
Rayedaran seba çalakîyan Delhî de xeylê rawestgehê metroyî padayî û înternetê mobîlî sînordar kerd. Hukmatê Modîyî amadekarîya qanûnî keno ke cezaya kesê ke persan eşkera kenê, giran bikero. Labelê protestokerî vanê; tenya giranbîyayîşê cezayan bes nîyo, ganî sîstemê îmtîhanî kok ra bibediliyo.
