Hewldayîşê çinikerdîşê nasnameyî: Kerkûk
Hewl û planê dewleta Tirkan ê seba caardîşê xewna xo ya 'Mîsaqê Mîllî' dewam kenê. Tewayîbîyayîşê Walîyê Kerkûkî yê kombîyayîşê Yewîya Şaredarîyanê Dinya ya Tirkan û endamîya Kerkûkî ya na yewîye de, şikûgumanê seba vurnayîşê demografî û nasnameyê Kerkûkî, wina zî amancê jeopolîtîkî û dizdîya nefta Kerkûkî kerdî pêtêr.
Şaristanê Mereşî yê Tirkîya de kombîyayîşê heyetê rayberîye yê Yewîya Şaredarîyanê Dinya ya Tirkan virazîya. Çiyo balkêş, Walîyê Kerkûkî Mihemed Seman zî tewrê kombîyayîşî bi û endamîya parêzgeha Kerkûkî ameye eşkerakerdene.
Dima ke peyendîya endamîye ameye kerdene, Walî Mihemed Semanî bale ante hewldayîşanê dewleta Tirkan ê seba tirkkerdîşê Kerkûkî û birnayîşê nasnameyê ci yê eslî ser. Semanî da zanayîş ke dewleta Tirkan û bi taybetî Recep Tayyîp Erdogan, bi giranî vurnayîşê nasnameyê Kerkûkî yê eslî ser o xebitînê.
Semanî va: "102 serran ra dima, sey walîyêkê Tirkmenî ma Kerkûk ra ameyî. Eke sîyasetê pêtî yê Erdoganî û paştgerîya sazîyanê Tirkîya nêbîyayê, Kerkûk de walîyêko Tirkmen nêameye weçînayene."
Semanî eşkera kerd ke sîyasetê teberî yê Tirkîya çiqas pêt bo, tirkê ke teberê welatî de yê, hendik eşkenê ligan ser o bimanê û têkoşîn bikerê. Teberê hewldayîşanê dewleta Tirkan ra, Cepheya Tirkmenan a ke Mihemed Seman serekîya ci keno, hemî tarîx û kulturê xo girêdanê bi dewletêk ra ke mafan nêdana Tirkmenanê welatê xo zî. Zextê erebkerdîşî, koç û bazirganîye reyde, hewlê tirkkerdîşê herême zî bîyê giran.
Xewna dewleta Tirkan a sereke 'Mîsaqê Mîllî' yo. Amancê dewleta Tirkan pawitişê kulturê tirkmenan nîyo; amancê ci enerjî û nefta Kerkûkî, jeopolîtîka herême û cakerdîşê xo yê Iraqî yo. Yewîya Şaredarîyanê Dinya ya Tirkan, rexistinêka sivîl û şaredarîyan a ke serra 2003 de ameya ronayene û merkezê ci Stenbol de yo. Na yewîye, seba pêtkerdîşê têkelîyanê kulturî, komelkî û teknîkî yê şaredarîyanê welatanê sey Tirkîya, Azerbaycan, Kazakistan, Kirgîzistan û herêmanê Balkan û Qafqasî de xebitîyena.
