Hesekê û Kobanê de çalakîyê ziwanê dayike
Girkê Legê de wendekar û welîyanê ke reaksîyon da qerarê Wezaretê Perwerdeyî yê Hukmatê Demkî yê Sûrîye yê perwerdeyê kurdkî yê 3 saetan, vengdayîşê naskerdişê heqê perwerdeyê bi ziwanê dayike kerd.
Şaristanekê Girkê Legê yê Qamişloyî de wendekar û welîyan verê mektebî de vera qerarê Wezaretê Perwerdeyî eşkerayî daye. Eşkerayîye bi nameyê wendekaran Hêlîne Umer wende.
Eşkerayîye de ame vatene ke heqê perwerdeyê bi ziwanê dayike heqêko unîversal o û ganî qerarê derheqê dersanê kurdkî de bilez bivurîyo û kurdkî mekteban de sey ziwanê perwerdeyî yo fermî bêro qebulkerdene.
Dewa Girê Pirê de zî bi eynî waştişî eşkerayî ameye dayene; Zeynebe Iniz vat ke ê qerarê Wezaretê Perwerdeyî qebul nêkenê û heta ke waştişê înan bêrê qebulkerdene, çalakî dewam kenê.
Hesekê de bi desan wendekar û mamostayan bi waştişê wedarnayîşê sînordarkerdişê perwerdeyê kurdkî verê Mudirîyetê Perwerdeyî de çalakî viraşte, pankartê "Zimanê me nasnameya me ye" û "Mafê me ye em bi zimanê xwe fêr bibin" akerdî û waştişanê xo yê nuştekîyan pêşkêşê Mudirîyetê Perwerdeyî kerdî.
Kobanê de zî wendekarê ke verê mekteban de ameyî pêser, ard ziwan ke ê sînordarkerdişê perwerdeyê kurdkî qebul nêkenê. Gedeyanê şehîdan ê Kobanê zî bi eşkerayîya ke Ehenda Mihemed wende, bale ante ke kurdkî tena dersêka rojane yan ziwanê keyeyî nîyo, ziwanê nasname, kultur û ameyoxî yo û waşt ke verê vurîyayîşê sîstemê perwerdeyî bi heme beşanê komelî reyde dîyalog bêro ronayene û herkes seba pawitişê kurdkî berpirsîyarîye bigîro.
