Hêrişanê mezhepperestan ê verba dûrzîyan de grûbêka neweye
Ame vatene ke grûba bi nameyê Mînbar Ensar el-Resûlî ya ke hêrişo bi bomba yo ke Ceremana de di kesî tede merdî bi xo ser girewt, hewtanê peyênan de verba dûrzîyan de eşkerayîyê bi tehdîdî weşannayê.
Zozanê Şamî de, Ceremana yo ke tede nifûsê dûrzîyan zaf o de, bi teqnayîşê bombaya ke ca kerdibî mînîbusa raywanan, di kesî merdî û 13 kesî zî birîndar bîyî. Na grûba bi nameyê Mînbar Ensar el-Resûlî ya ke tayê wext verî vejîyaye rawe, no hêriş bi xo ser girewt. Grûbe, hîrê hewtî verî serê medyayê sanalî ra fealîyet da destpêkerdene û bi eşkerayîyanê xo komelê dûrzîyan ê Ceremana û Sûrîyeyî kerd hedef.
Fealîyetanê na grûbe yê ke yenê zanayene ra yew, peyê mesajanê dînîyan ê ke 13ê Temuze de weşannayî ra dima, eşkerayîya ke verba komelanê dûrzî û xrîstîyanan ê Ceremana de daye bîye.
Mînbar Ensar el-Resûlî hêrişo peyên girewto xo ser û rojo ke vejîyaya rawe eşkerayîyanê xo zafêrî Ceremana û komelê dûrzîyan ser o awan kerdê; no zî mojneno ke xeta hêrişanê mezhepperestan ê verba dûrzîyan de grûbêka neweye zî bîya daxil.
