Herêma Kurdîstanî ya Federeyî de partî û rêxistinan ra vengdayîşê ‘heqê hêvîye’

Seba caardişê "heqê hêvîye" yê Rayberê Şarê Kurdî Abdullah Ocalanî rê, Herêma Kurdîstanî ya Federeyî de hetê 28 partîyê sîyasîyî, rêxistin û kesan ra Temsîlkarê Daîmî yê Monako yê Konseya Ewropa û eynî wext de Serekê Komîteya Wezîran a Konseya Ewropa Gabriel Revelî rê yew mektuba akerde ameye erşawîtene. 

Mektuba ke bi rayberîya “Komîteya Abdullah Ocalanî rê Azadîye” ameye erşawîtene de dîya zanayîş ke; vera şerî yo ke Rojhelatê Mîyanênî de krîzê xorin yê ekonomîk û sîyasîyî viraştê, bi vengdayîşê Aştîye û Komelê Demokratîkî yê Abdullah Ocalanî seba çareserîya probleman bi rayîranê aştîyane û bêşîdetî veng berz bîyo û nê vengî seba çareserîya pêrodayîşanê Rojhelatê Mîyanênî yew perspektîfo newe ardo.

Balantişê çareserîya sîyasîye

Mektube de ame vîrardiş ke bi vengdayîşo ke Abdullah Ocalanî 27ê Sibata 2025î de kerdo, PKK stratejîya xo ya têkoşînê çekdarî ra fek verado û çekî ameyê vêşnayîş û wina ame vatene: “Seba nê gamanan, vakurê Tirkîya, Surîye û Iraqî de pêrodayîşî vindertî û Tirkîya bîye yew welatê herême ke rasterast tewrê şerê Rojhelatê Mîyanênî nêbîya. Reyna Abdullah Ocalanî seba pêrodayîşanê Surîye veng da pêro hetanê eleqedaran û seba îstîqraro domdare bale ante muhîmîya vindertişê pêrodayîşan û çareserîya sîyasîye ser.”

'Seba tewrbîyayîşê pratîkî yê ravêrî ganî azad bo’

Mektube de ame dîyarkerdene ke seba tepişteyîya ey ya Îmraliyî tewrbîyayîşê aktîf yê Abdullah Ocalanî yê ravêrî avzel o û şertanê zîndanî de qet yew bedilîyayîş nêameyo kerdene, îrtîbatê Abdullah Ocalanî yê teberî giredayeyê qeraranê sîyasîyan yê rayedaranê Tirkîya yo. 

Mektube de ame qeydkerdene ke rapora ke Sibata 2026î de hetê komîsyonê eleqedarî ra ameya weşanayîş de, bale ameya antene muhîmîya caardişê pêro qeraranê Mehkemeya Heqanê Merdiman ya Ewropa û Mehkemeya Qanûnê Esasî ya Tirkîya ser û xurtkerdişê mekanîzmayanê mewcudan ameyo tewsîyekerdene. La babete hema zî bi perspektîfê mucadeleyê terorî yena destgirewtene û no zî verê dîyalogo raştikên û pêameyîşî de beno asteng.

Dewamê mektube de nê îfadeyî ca girewtî: “Ma sey partîyê sîyasîyî yê kurdîstanijî, rêxistinê komelê sîvîlî yê Iraq û Herêma Kurdîstanî, Komîteya Wezîran a Konseya Ewropa ra wazenê ke qerarê Mehkemeya Heqanê Merdiman a Ewropa yo serra 2014î yê derheqê ‘Heqê hêvîyeî’ yê Abdullah Ocalanî bişinasno. No do seba çareserîya rewşa huqûqî û sîyasîye ke Abdullah Ocalan tede ro û seba tewrbîyayîşê ey yê tam yê ravêrî bibo gamêka yewina muhîme. Reyna ma veng danê ke seba tewrbîyayîşê pratîkî yê ravêrî, Abdullah Ocalan azad bimano û îmkanê tam û bêsînorî bêrê dayene.”