Hepso sîyasîyo ke linga ci şikîyaya 21 rojî yo nêbenê nêweşxane

Vejiya werte ke Zîndanê Giresun Espîye yê Tîpê L’yî yê Girewteyî de wexto ke spor kerdêne linga Aydin Oguzî şikîyaya û 21 rojî yo nêbenê nêweşxane. 19ê Temmuze de wexto ke Oguzî spor kerdêne linga ci şikîyaye. Oguzî rewşe û îxlalê ke qewimiyayî, pêvînayîşê telefonî yê hewteyî de keyeyê xo rê vatî. Ey vat ke embazanê ci xeber daye û dima o berd revîrê zîndanî. Revîr de tedawîyo verên ra dima sevkê ci yê nêweşxaneyî ameyo kerdene, labelê leşkeran "cigêrayîşê mîyanê fekî" ferz kerdo û seba ke ey nê ferzkerdiş qebul nêkerdo nêberdo nêweşxane.

Keyeyî da zanayene ke Oguzî leşkeran rê vato: “Eke problem asayîş o, mi hetê şima de kuxa, eşkena hetê şima de awe zî bişima. Labelê ez nê cigêrayîşê şima yê mîyanê fekî qebul nêkena.” 

Ame vatene ke Oguzo ke linga ci şikîyaya rojeke dima reyna seba tedawî şiyo revîr û doktorê revîrî seba linga ci ya şikîyaye nuşteyê “sewko lez”î nuşto û seba sevkî o ameyo verê berî. Labelê reyna rîyê ferzkerdişê leşkeran yê “cigêrayîşê mîyanê fekî” ra sevkê ci ame astengkerdene. Keyeyî vat ke roja ke linga Oguzî şikîyaya ra nata linga ci pê bezê pêşîyayîşî ameya pêşayene û tenya yew gopal (baston) dîyayo ci.

Oguzî pêvînayîşê telefonî yê bi keyeyê xo de da zanayene ke hema zî sevkê ci yê nêweşxaneyî nêameyo kerdene û wina vat: “Rojanê verênan de seba linga mi ya şikîyaye yew krem dîya mi. O krem qedîya ra dima reyna çiyêk nêdîya. Çiqas ke werimîyayîşê linga mi tayê kêm bîyo zî, dejê ci dewam keno.”