Hemserekanê DEM Partî venga Meclîsî da ke kom bibo

Hemserekan eşkerayîya xo ya nuştekî de vat ke enflasyono kronîk, îflasê ke zêde benê, barê deynî, rîskê jeopolîtîkî, zamê fîyatanê sotemenî û peynî de kaos û talano ke bi sebebê bêkontrolîye Borsaya Îstanbulî de vejîya, mojnenê ke ekonomîya Tirkîya de êdî zengilê alarmî kuwenê: "Tabloyo ke fîyatê sotemenî lître de se lîrayan vîyarnayo de îqtîdar ganî herinda seyrkerdişê bêçareyîya mîlyonan welatî, esnaf, berhemdayox û sanayîkaran de gamanê şênberan bierzo. Vizêrî bazarê Borsaya Stenbolî de BIST 100 se ra 6 ra zêdeyêr erj vindî kerd. Nika persê ke ganî bêrê verpersdayene eşkera yê: nê rîskî key ra ameyêne zanayene, dezgehanê kontrolkerdoxan se kerd? Ma mîyanê krîzêkê têmîyanî de yê ke hetêkê ci rasterast talan o, heto bîn zî bêkontrolîya dezgehanê ke lîyaqetî ra dûrî kewtî û îdareyo xirab ê ekonomî yo."

Hemserekan ard ziwan ke girewtişê berpirsîyarîye vera nê tabloyî tena wezîfeyê îqtîdarî ney, wezîfeyo lezkanî yê TBMM û heme dezgehê sîyasetî yo û gamê sey nînan pêşnîyaz kerdî: subvansekerdişê sotemenîya citekar û berhemdayoxanê qijan, kontrolêko objektîf û teng ê bazaranê sermîyanî, bacêko berz seba ê kesanê ke faîz û rantî ra qezenc kenê, verê heme bankan, polîtîkayê pêroyî yê bingeyê lîyaqetî, tedbîrê ke welatîyî pawenê ney wayîranê sermîyanî, hewanayîşê faîzê deynanê citekar, berhemdayox, KOBÎ û welatîyan, kêmkerdişê barê faîzî yê budceyî, edaletê bacî û tedbîrê ke feqîr û kedkarî bi rûmetê merdimîye ameye bigîrê.

Eşkerayîye de ame vatene ke padayebîyayîşê Meclîsî nêbeno sebebê pawitişî û her roja ke heta 1ê Teşrîna Verêne vîyarena, bedelê krîzî gird kena: "Ameyoxê Tirkîya nêyeno kerdene qurbanê kayanê borsa, baronanê faîzî û kapîtalîzmê qumarxaneyî. Ma sey DEM Partî amade yê ke piştî bidê her gama ke welatê ma na tengîye ra vejena. Vengdayîşê ma eşkera yo: TBMM ganî bê pawitişê 1ê teşrîna verêne seba girewtişê tedbîranê lazimîyan bi hawayêko awarte kom bibo."