Hemamo tarîxî bêwayîr ameyo caverdayiş!
Qers de Hemamê Mazlum Axayî yo ke seserra 18ine ra mendo, çarenuşteyê xo rê ameyo caverdaîş û betal mendo. Hemamo tarîxîyo ke mîyanê mîrasê kulturî yê Qerse de ca gêno, restorasyonê ci qedîyayo, la hema zî girotî yo.
Awanîya ke taybetmendîyê mîmarîya osmanijan xo de pawena, çar beşan ra (cayê serdî, nêmgerimî, gerimî û kulxan) yena pê. Hemamo ke 1991 de ameyo tescîlkerdiş, heta serra 1970î ameyo xebitnayiş û dima ra fonksîyonê xo vînî kerdo.
Çimkî kîtabeyê ci nêresayo roja ma, tarîxê viraştişê ci tam nêzanyêno. Heman wextî de serra 1829î de şaîro Ruso namdar Puşkînî tîya zîyaret kerdo, coka ci rê "Hemamê Puşkînî" zî vajîyêno. Seba hemamî serra 2017î de dest bi restorasyonî ame kerdiş û xebatî 2021 de qedîyayî. Rixmê qedîyayîşê restorasyonî zî awanîya tarîxîye onca girotî ya. Çunke statuyêko rast nêdîyayo ci û verê berî de "Kewtişê zereyî tehlukeyin û qedexe yo" nusîyayo.
Tewr peynî Îdareyê Xususî yê Qersî, bi şertê ke 20 serrî sey hemam bixebitiyo, seba kîradayişî îhale da destpêkerdiş. Goreyê nê projeyî ganî xebatê temîratî onca bêrê kerdene.
