Grûbê hetgiran: Vera tîryakî têkoşîn bi rêxistinkerdişî beno
Grûbê hetgiran ke çarçewaya hemleya ‘’Rabin’’ de vera zêdîyayîşê tîryakî û polîtîkayanê şerê taybetî xebatanê xo domnenê, vat ke vera tîryakî têkoşîn bi xopawitiş û rêxistinkerdişî beno.
Çarçewaya hemleya ‘’Rabin/Wurzê’’ ya ke hetê Platformê Şiyar Be ra vera polîtîkayanê şerê taybetî û tiryakî ameye destpêkerdene, Amed de kombîyayîşê şarî, çalakîyê nobete û rayraşîyayîşî dewam kenê.
Kombîyayîşanê mehlayan de yeno vatene ke tîryak bitaybetî herêmanê feqîran de zêdîyeno û waranê hemparan ê şarî de rîskê şuxulnayîşî zaf o. Şar seba çareserî veng dano ke wa rêxistinkerdiş û têkoşîn bêro xurtkerdene.
Grûbanê hetgiranê Aemdsporî bale ante ser ke serra şuxulnayîşî ya tîryakî heta 8-9î ameya war ê zî seba ke qijan û ciwanan tîryakî ra bipawê xebatan rayra benê. Grûbê hetgiran ê Azadî, Xoverdayîş û Barîkatî seba xurtkerdişê têkoşînê vera fuhuş û tîryakî veng da ke pêro pîya têkoşînî trîbunan ra bikirişê mehlayan.
Grûbanê hetgiran ard ziwan tîryak keyeyan û cuya komelkî ser o tesîro xirab keno û vat ke bitaybetî parkan û binê pirdan de şuxulnayîşê ci zêdîyayo. Grûban îfade kerd ke ciwanî ganî tîryakî ra dûrî de bêrê tepiştene, verê înan bidîyo spor û cuya komelkî û vat ke çareserî rêxistinkerdiş, paştdayîş û xopatişî ra vîyarena.
Ciwanan û grûbanê hetgiranê vat ke hedef kenê ke têkoşîno ke dayo destpêkerdene şaristananê bînan de zî bêro vilakerdene.
