Gimgim de Festîvala Koxî dest pêkerd
Festîvala Koxî ya ke Gimgim de 12 serrî yo bi behaneya "ewlehîye" qedexe bî û Şaredarîya Gimgimî ra ameyo organîzekerdene, bi yew rayîrşiyayîş dest pêkerd.
Festîvala Koxî ya ke 12 serrî yo bi behaneya "ewlehîye" qedexe bî û bi pêşengîya Şaredarîya Gimgimî (Vartoyî) ya Mûşî û dezgehanê komelê sivîlî ameyo organîzekerdene, bi rayîrşiyayîş dest pêkerd. Festîvala ke bi şîarê "Hêza hunerî reyde do aştîye bera welatê rojî" ameyo viraştene de verê cû verê otogarê qezayî ra heta Meydanê Koxî bi davul û zurna rayîrşiyayîş ame kerdene. Rayîrşiyayîş de pankartê "Bi hêza hunerî aşitî, were welatê rojê" û "Hêza hunerî reyde do aştîye bera welatê rojî" ameyî akerdene.
Rayîrşiyayîşî ra dima Meydanê Koxî de govende ameye geyrayene. Govendan ra dima "Nawitişê hunerê hemçaxî-karmayî" ya ke Kooperatîfê Cinîyan ê Hafizaya Vartoyî de amebî akerdene, ameye zîyaretkerdene. Girseyî zîyaretê nawitişê kooperatîfî ra dima verê xo da Kûçeyê Sofularî.
Hemserekê Şaredarîya Gimgimî Giyasettîn Aydemirî akerdiş de qise kerd û da zanayene ke 12 serrî yo festîval nêameyêne kerdene û vat ke ê do kulturê xo bidê ramitene. Qiseykerdişî ra dima kurdelayê akerdişê festîvale ameye birnayene.
Festîval de aştîye do bêra munaqeşekerdene
Festîval ewro bi sohbet û qiseykerdişê bi sernameyê "Çinkerdişê ekolojîkî" û panelê bi sernameyê "Persê Kurdî de Çareserîya Demokratîke" do dewam bikero. Aktîvîstê Têgêrayîşê Cinîyê Azadî (TJA) Sebahat Tuncel û Hemserekê Pêroyî yê Komeleyê Heqanê Merdiman (ÎHD) Cîhan Aydin do sey qiseykerdoxan panel de ca bigirê. Panelî ra dima konserê ke Meydanê Koxî de yeno viraştene de Dodan, Navdar Denîz, Umut Gunduz û Firat Guneş do vejiyê sehne ser û bi nê qaydî roja yewine ya festîvalî do biqeda.
