Gerîlayê şehîdî yê Azadîya Kurdîstanî yenê vîrardene

Êlih de bi pêşengîya MEBYA-DERî programê yadkerdişî yê seba gerîlayanê HPG/YJA Starî Taxa 19 Mayisî de roja xo ya dîyine de dewam keno. Verê yadkerdişî ke bi hezaran hemwelatîyî û temsîlkarê partî û rêxistinî beşdar bîyî, rayîrşîyayîş ame viraştene û şarî sloganê “Bijî Serok Apo” û “Rêya şehîd rêya me, PKK partiya me” vatî.

Bedlîs de yadkerdişî şodir ra bi sloganan dest pêkerd; masaya fotografanê gerîlayanê şehîdan bi rengê zerd, sûr û keskî ameye xemilnayene û salone de pankartê “Şehîdên me rûmeta me ye”, “Şehîd roniya riya me ye” û “Şehîd namirin” ameyî aliqnayene. Colemêrg de yadkerdiş salonêkê dawetî de roja dîyine de yo; bi hezaran kesî her çar hetanê bajarî ra ameyî, şarê Şemzînanî bi sloganê “Şehîd namirin” şi warê tazîye û keyeyê ke Çelê de tazîye ronaya zî beşdar bîyî. Yadkerdişî de mesajê sersaxîye yê tepişteyanê hepisxaneyanê cîyayan ameyî wendene.

Bazîd û Panosê Agirî de zî yadkerdişî ameyî viraştene; Hemsereka Pêroyî ya DEM Partî Tulaye Hatîmogullari zî beşdar bîye. Îdir de Keyeyê Tazîye yê Ozgurî de, Îzmîr de Komela Piştîdayîşî ya Pasûrijan a Buca de yadkerdişî roja dîyine de dewam kenê.

Erzirom de qezayanê Tatos, Qereyazî, Xinûs û Qereçobanî de yadkerdişî ameyî viraştene; Tatos de Camîyê Merkezî de polîsan destûr nêda ke fotografê şehîdan bêrê aliqnayene. Badê yadkerdişanê di rojan programo hempar ê heme qezayan Qereyazî de yeno viraştene.

Qers de awanîya wîlayetî ya DEM Partî de yadkerdiş ame viraştene û Hemserekê Pêroyî yê DEM Partî Tuncer Bakirhan zî beşdar bî. Semsûr de Keyeyê Tazîye yê Mehmet Erdemogluyî de yadkerdiş roja dîyine de dewam keno; bi nameyê MEBYA-DERî ame vatene: “Şehîdê ma seba nê şarî têkoşîn da û nê rayîrî de cuya xo ra bîyî. Ma zî rayîrê înan de şinê.”