Gerîlayê HPG û YJA Starî: Komplo bi têkoşînî pûç bi

Komployê 9ê teşrîna verêne ya 1998î de hetê hêzanê hegemonan ra vera Rayberê Şarê Kurdî Abdullah Ocalanî dest pêkerd. Amancê komployî, ke zaf dewletanê neteweyan tede ca girewtbî, şexsê Rayberê Şarê Kurdî Abdullah Ocalanî de wedaritişê îradeyê şarê kurdî bi. La planê hêzanê hegemonan pûç bîyî.

Gerîlayê HPGyî Botan Mêrdînî vat ke komplo bi pêşengîya dezgeyanê îstîxbaratî yê Amerîka û Îsraîlî û hemkarîya tayê kurdanê judenratan dest pêkerd û proseso 4 aşmî bi esîrîya Rayberê Şarê Kurdî Abdullah Ocalanî qedîya. Botan Mêrdînî wina vat: “Komplogeran paradîgmaya Rayber Apoyî ke alternatîfê modernîteya kapîtalîst a, xo rê astengêko gird dîyêne. Komplo ewro zî bi rayîr û metodanê cîyayan dewam keno, la Rayberîye bi vindertişê xo yê Îmrali pûç kerd. Ma sey gerîlayanê HPGyî, heta ke Rayber Apo azadîya xo ya fîzîkîye nêresno, do têkoşînê xo bidomnê.”

Gerîlaya YJA Starî Dîcle Serbilind dîyar kerd ke komplogeran waştêne şexsê Rayberîye de Têgêrayîşê Azadîye wedarê û Têgêrayîşê Cinîyan tesfîye bikerê. Dîcle Serbilind vat: “Ma sey şerwanê Rayber Apoyî, bi vindertiş û îradeyo ke Rayber Apoyî ma de viraşto, do nê komployî pûç bikerê. Amancê ma yê sey gerîlayanê cinîyan, azadîya fîzîkîye ya Rayber Apoyî ya. Ma soz danê ke heta ke azadîya fîzîkîye ya Rayber Apoyî nêvînê, do têkoşînê xo bidomnê.”

Gerîlaya YJA Starî Sozda Amara vat ke komplo tena vera Rayberê Şarê Kurdî Abdullah Ocalanî nê, vera heme şarê kurdî ame tatbîqkerdene: “Înan waşt ke hepisxane de şarê kurdî zî esîr bigîrê. La dewleta Tirke bi nê komployî tersê xo hîna zaf mojna. Çalakîyê ke komplo ra dima vejîyayî meydan, girêdayîşê şarê kurdî yê Rayber Apoyî reyna mojna. Ma sey mîlîtanê cinî yê Rayberîye, bê azadîya fîzîkîye ya Rayberîye qet têkoşînî ra peyser nêvindenê.”

Gerîlayê HPGyî Zinar Raperînî ard vîrî ke 1999 de zaf ciwanan seba pûçkerdişê komployî xo veşna û çalakîyê heval Rûkene û Sara yê 2022î, Rojhat û Erdal yê 2023î û Rojger û Asya yê 2024î pêro teşrîna verêne de bîyî. Zinar Raperînî wina vat: “Rayberî kesêk nîyo, nasnameyê şarê kurdî yo. Çiqas ke komplo qels bîyo zî, Rayberîya ma hema zî Îmrali de esîr a. Ganî şar û Têgêrayîş sey ciwananê ke bi çalakîyanê ‘Şima Nêşenê Roja Ma Tarî Bikerê’ cewab dayo komployî, dormeyê Rayberîye de bibê xelqayêka adirêne.”