Generalê Qijkekî yê Apê Musayî ra vilakerdoxan rê vengdayîş: Resnayîşê heqîqetî ra fek vera medê!

"11ê Teşrîna Verêne Roja Vilakerdoxanê Rojnameyan ê Dinya", roja karkeranê ke tewr şertanê giran û çetinan de, wextê zext û zorî de zî rojnameyan resnenê şarî ya. Na roje eynî wext de roja "Generalanê Qijkekan ê Apê Musayî" yê Çapemenîya Azade û pêro vilakerdoxan a. Zafer Tuzuno ke serranê 90an de vilakerdoxîye kerda, derheqê muhîmîya na roje de qisey kerd.

Tuzunî ard ziwan ke ewro wasitayê îrtîbatî û teknolojî zaf aver şîyê, la rojnameyî tayê kesan rê qîmetê xo nêkerdo vîndî û wina vat: “Zaf wendoxî bi şertê abonetîye, keyeyan û kargehanê xo de rojnameyan wanenê. La zaf kesî nêfikirîyenê ke o rojnameyo ke yeno berê înan, bi kamcîn zehmetîyan reseno destê înan.”

'Ma mîyanê tersê mergî de bîyê'

Serra 1993 de rojnameyê Ozgur Gundemî de xebatê xo û zehmetîyê o wextî ser o Tuzunî nê çîyî vatî: “Ez zî yew vilakerdoxo kehen û Generalê Qijkekî yê Apê Musayî ya. Mi o wext dî ke no kar senî mîyanê tersê mergî de bi. Ma her roje keyeyî ra vejîyayîş û agêrayîşî de eynî raye nêşuxulnayêne. Çira? Çunke wextê mergî bi; ma kûçeyanê Amedî yê tengan de bi qîrayîşê ‘Nuseno, raştîyan nuseno... Rojnameyê raştikanî Ozgur Gundem ame!’ rojnameyî resnayêne wendoxan. Ewro teknolojî aver şîyo, her çî têlefonan de vila beno la sayeyê wendoxanê rojnameyan de no veng qet nêbirîya û nino birnayîş zî.”

Xelekaya tewr muhîm a

Tuzunî bale ant qîmetê vilakerdoxan ser û qiseykerdişê xo wina qedîna: “Vilakerdoxî, şertê hewayî senî benê wa bibê, zivistan û hamnan, vewr û herîye de xebitîyenê ke kes bêxeber nêmano. Eke vilakerdoxî nêbîyêne, qîmetê xebere, nuşte, sêwirnayîş û kedanê bînan zî nêmendêne. Çunke vilakerdoxî nê zîncîrî de xelekaya peyêne û tewr muhîm a ke rojnameyî resnena şarî. Ez pêro vilakerdoxan rê spas kena û hêvî kena ke ê do heta peynî bi hêvî rojnameyanê xo vila bikerê û têkoşînê xo ra fek vera nêdê.”