Generalanê Qijkekan ê Apê Musayî ra mesaj: Ma do mîrasê şehîdanê xo bipawê!

"11ê Teşrîna Verêne Roja Vilakerdoxanê Rojnameyan ê Dinya", roja karkeranê ke tewr şertanê giran û çetinan de, wextê zext û zorî de zî rojnameyan resnenê şarî ya. Na roje eynî wext de roja "Generalanê Qijkekan ê Apê Musayî" yê Çapemenîya Azade û pêro vilakerdoxan a. Na çarçeweyî de, vilakerdoxanê Çapemenîya Azadî ra Meryem Akçîçek û Hasan Gulî derheqê muhîmîya na roje de qisey kerd û peyamê têkoşînî dayî.

Vilakerdiş têna kar nîyo, yew ked û berpirsîyarî ya

Meryem Akçiçeke sey Generale Apê Musayî karê vilakerdoxîye kena. Akçiçeke, seba 11ê Teşrîna Verêne Roja Vilakerdoxan ê Dinya rojnameyê Azadîya Welatî rê qisey kerd û wina vat: “Ez rojnameyê Yeni Yaşam û Azadiya Welatî vila kena. Ez nêfikirîyena ke ez têna rojnameyan vila kena, ez eynî wext de seba vengê şarî zî xizmet kena. Wextê ma de, resayîşê agahîyanê raştan û zanayîşê fikranê cîya-cîyayan zaf muhîm o. Çunke çapemenî têna xeberan nêdana; ganî problemanê komelî, halê kedkaran û vengê şarî zî bimoja. Mi rê, vilakerdişê rojnameyî têna kar nîyo; o eynî wext de yew berpirsîyarî û ked a. Ez bawer kena ke çapemenîya azad û heqê girewtişê agahîyan ê şarî ganî her tim bêrê pawitiş.”

‘Ma do wayîrê mîrasê şehîdanê xo bivejîyê’

Vilakerdox Hasan Gulî zî bale ant zehmetî û qîmetê xebata vilakerdoxan ser û bi nê vatîşan roja hemrayanê xo pîroz kerde: “Sere de Generalanê Qijkekan ê Apê Musayî, pêro hemrayanê mi yê vilakerdoxan ê ke bi can û wîjdan têkoşîn kenê, ez 11ê Teşrîna Verêne Roja Vilakerdoxanê Rojnameyan ê Dinya bi zerrî ra pîroz kena. Ma qetî karê xo sivik nêgirewt. Ma do her tim bi têkoşîn û keddayîşî, wayîrê mîrasê şehîdanê xo bivejîyê. Roja Vilakerdoxan ê Dinya pîroz ba.”