Fîlozofê amerîkayijî ra Abdullah Ocalanî rê mektube

Pêşenganê sosyalîzmê seserra 21ine ra fîlozofê amerîkayijî Michael Hardtî yew mektube nuşte Rayberê Şarê Kurdî Abdullah Ocalanî. Hardtî mektubeya xo ya bi sernameyê “Ma ganî enternasyonalîzmî reyna awan bikerê” daye Heyetê Îmraliyî.

Mektubeya Hardtî wina ya:

"Birêz Abdullah Ocalan,
Nê rojan de ke ma bi şerê ke zêde benê, qirkerdiş û hêrişê emperyalîstan têrî mendê, wina yeno mi ver ke êdî xeta teorîk û pratîke de enternasyonalîzm reyna bîyo hewce. Labelê bi eşkerayî aseno ke, seba ke bişêro şertanê ewroyî weş bêro, ganî ma enternasyonalîzmî ser o reyna bifikiriyê û ey reyna awan bikerê. Derheqê ci de ke enternasyonalîzm ewro zî yew projeyo girîng o ke ma ganî qeweta xo bidê ci ya nê û eke wina yo, o eşkeno senî bêro sîstemkerdiş û şeno senî yew rol kay bikero de, eke şima fikranê xo mi de pare bikerê, ez bena kêfweş.
Beno ke termê ke mi xebitnayê, raşt nêbê; çunke enternasyonalîzmê ke qestê mi yo, tenya yew fehmê ke mîyanê dewletanê neteweyî de girêdayeyê îtîfaqan o, nîyo. Serra 1970an de serekê Partîya Panteranê Sîyahan Huey Newtonî, sey alternatîfê nê tegêhê 'mîyan-komunalîzmî' (inter-communalism) yanî mîyanê komelîyan pêşkêş kerd û ez na xebata ey teqdîr kena. Goreyê fikrê mi ewro enternasyonalîzm (ya zî ma çi name bidê ci) ganî yew projeyo zafqatî bo. Tayê dewletê vernîyayinî eşkenê rolanê sînordaran bigîrê û îtîfaqanê herêmî zî verê cû zaf feyde dayo. Labelê ez bi zanyarî û tecrubeyanê xo eşkena vaja ke merkezê giranîye yê projeyêkê enternasyonalîstî ganî têgêrayîşê azadîye yê hemdemî bê. Pîya bi nê reyde, no zî yew raştî yo ke ewro têgêrayîşê azadîye vera zextanê giranan û ablûqaya îdeolojîke de zehmetîyanê pîlan de têkoşîn kenê. Zaf çîyê bînî estê ke bêrê vatiş. Ez zanena ke no tenya berê yew munaqeşeyo zaf hîra akeno. Labelê ez nika tîya de vinderena.”

Michael Hardt kam o?

Michael Hardt, fîlozof û teorîsyenê sîyasetî yo amerîkayij o ke 17ê Tebaxa 1960î de ma ya xo ra bîyo. Bi taybetî xebatanê xo yê derheqê antropolojîye, felsefeya sîyasetî û kapîtalîzmê xorînî de yeno naskerdiş. Eseranê xo yê sey Empire, Multitude û Commonwealth de ke pîya bi Antonio Negriyî nuştê, têkilîyanê îqtîdarê xorînî yê hemdemî, babetanê xoverdayîşî û îmkananê çalakîya hemparî analîz kerdê; kavramê kapîtalîzm, demokrasî û mulkîyeto hempar bi perspektîfêkê radîkalî girewtê dest. Xebatanê Hardtî, waranê kuramê sîyasetî û teorîya rexneyî de asta mîyanneteweyî de yew bandora girîng viraşta.