Festîvala Munzurî ya 24. dest pêkerd
Festîvala Munzurî, bi meşêko ke ver bi Meydanê Seyîd Rizayî va ame kerdene dest pêkerd. Qisekerdişan de armancê festîvale û polîtîkayê herbê taybetî ameyî destnîşankerdene.
Festîvala Kultur û Xozaê Munzurî yo 24. bi şîarê “Seba Vîr û Cûyêka Azade Ma Wayîrê Xoza, Ziwan, Kultur û Bawerîya Xo Vejîyenê” dest pêkerd. Bi beşdarbîyayîşê temsîlkaranê partîyanê sîyasîyan û sazîyanê komelkîyan, Kuçeyê Hunerî ra ver bi Meydanê Seyîd Rizayî ra meşîyayî. Meş de sloganê “Dêrsim rûmet o, wayîrê rûmetê xo vejîye”, “Munzur do azad biherikîyo”, “Gulîstan Doku koti ra ya?” û “Festîval ê şarî ya, nêno bêvengkerdene” ameyî vatene.
Seba Komîteya Amadekarîye Umît Karabulutî va: “Sey 26 serranê verî ma ewro reyna ameyî têhet. O wext Dêrsim binê adirî de bi. Ewro zî Dêrsim binê zilmî de yo. Festîvala Munzurî tarîx, bawerî û kulturê xo sereno ra. Ma têhet de bibê ma do xurt bibê, nêbo ma do parçe bibê.”
Temsîlkarê Federasyonê Yewîyanê Dêrsimî yê Ewropa (ADBF) Alî Tacarî zî va: “Festîval netîceya yew arêdayîşê tarîxî yo. Homa şahîye nîyo. Şevekitişê kultur, ziwan û bawerîya ma sîyaset o. Ma nêdanê ke yew gruba qice festîvala ma xirab bikera.”
Parlemantera DEM Partî ya Dêrsimî Ayten Kordu zî va: “Na erdnîgarîye bi têkoşîn û kedêka pîle ameya hûnene. Dêrsimî seba azadîya hemû şaran têkoşîn da. Gulîstan Doku netîceya polîtîkaya bêgorverdayîşî ya. Cayanê ma yê bimbarekan de kontrolê nasnameyan yeno kerdene. Ma waştişê komîsyonê heqîqetî kenê. Ma do aştîye bi têkoşînê xo bîyarê ca.”
Qisekerdişan ra dima, coşê festîvalî bi govende dest pêkerd.
