Êlih de ciwanan ra yadkerdişê Xoverdayîşê 14ê Temuze
Semedê serrgêra Xoverdayîşê Rojeyê Mergî yê 14ê Temuze ra, Êlih de hetê ciwanan ra yew aktîvîteya yadkerdişî ameye organîzekerdene. Aktîvîteya ke tede sînevîzyon ame mojnayene, zaf ciwanî tewrê ci bîyî.
Êlih de ciwanan, semedê serrgêra Xoverdayîşê Pîlî yê Rojeyê Mergî yê 14ê Temmuze yew aktîvîteya yadkerdişî organîze kerde. Dema ke zaf ciwanî tewrê aktîvîte bîyî, sînevîzyono ke xoverdayîşê 14ê Temuze qala ci keno ame temaşekerdene. Yadkerdiş de heto bîn ra şîîra M. Hayrî Durmuşî ya bi nameyê 'Domana Gunayî' ameye wendene. Zîndanê Amedî yê 5 Hûmarî de, vera polîtîkayanê zext û îşkenceyî de, bi pêşengîya M. Hayrî Durmuş, Kemal Pîr, Akîf Yilmaz û Alî Çîçekî Xoverdayîşê Pîlî yê Rojeyê Mergî yê 14ê Temmuze ame afernayene û her serre bi aktîvîteyanê cîyayan yeno yadkerdene.
Ravêrê Derbeya Eskerî ya 12ê Eylule 1980î de, ya ke sey yew demê tewr tarî yê Tirkîya yêna ercnayene, goreyê datayanê resmîyan 650 hezar kesî ameyî destbendkerdene, 230 hezar kesî ameyî muhakemekerdene û nêzdîyê 52 hezar kesî zî ameyî tepiştene. Heqê 7 hezarî ra zêdêr kesan de cezaya îdamî ameye waştene û 50 kesî ameyî îdamkerdene.
