Efrîn de banê talankerdeyî û dewê wêrankerdeyî
Koçberê Efrînî yê ke agêrayî dewe û bananê (keyeyanê) xo, raştê dîmenê wêranîye û talanî ameyî. Fotografê ke yew dewa qezaya Şeranî ra ameyê, asta talan û wêrankerdîşî mojnenê ra.
Çiqas ke bi hezaran keyeyê koçberî yê Efrînî herêmanê Kobanî û Cizîrî ra agêrayî bananê xo, la semedo ke xeylê dewî û banî hetê niştecihanê bîyanîyan (xerîban) ra ameyê wêrankerdene û talankerdene, şaro resen nêeşkeno agêro bananê xo.
Şaro koçber o ke agêra dewe û bananê xo, cayê keda xo ya bi serran de, dewe û banê wêrankerdeyî û talankerdeyî dîyî. Piranîya banan rîyê hêrişanê dewleta Tirke û çeteyanê ci ra wêran bîyê, ê ke mendê zî hetê niştecihanê bîyanîyan ra ameyê talankerdene.
Keyeyanê koçberan ê ke agêrayê, da zanayene ke niştecihanê bîyanîyan çi ke zereyê banan de esto talan kerdo, heto bîn ra asinê ke banî pê ameyê viraştene zî berdê. Coka piranîya keyeyan mecbûr ê ke cayanê demkîyan de yan zî hetê merdimanê xo de bimanê. Dîmen û fotografê ke dewa Duraqliya ya qezaya Şeranî ra resayê destê ma, asta wêranî û talanê mîyanê dewe mojnenê ra.
Şarê dewe vat ke 8 keyeyê erebî yê ke wayûbirayê yewbînî yê, dewe de ca bîyê û dewe mîyanê xo de bare kerdibi. Nê keyeyan mîyanê 8 serran de heme banê dewe talan kerdê.
