E-posteyê ICE’yî eşkera bîyî: Hemkarîya Îran û DYA’yî vejîya werte
Qiseykerdişê rayedaranê Dezgehê Pawitişê Gumruk û Koçberan yê DYA (ICE) yê ke ameyê eşkera kerdene, îxrackerdişê (sînor ra teber kerdiş) îranijan de hemkarîya mabênê DYA û Îranî mojna ra.
Konseyê Amerîkayijanê Îraniyan yê Neteweyî (NIAC), nuştişê rayedaranê ICE’yî yê mîyanê xo de parve kerdî. Nê nuştişan mojna ra ke serra 2025î de seba îxrackerdişê îranijan, DYA û Tehranî pîya hemkarî kerda. Goreyê xebereya DW’yî, nê e-posteyî derheqê hîrê seferanê teyareyanê îxracî yê aşma Êlule û Kanûna 2025î û Çeleya 2026î de ke 100 ra zêde îranijî erşawiyayî welatê înan- hûrgiliyê tewr zelalî yê hemkarîya Tehran û Washingtonî mojnenê ra.
Tehranî waşt, DYA’yî îxrac kerd
Nuştişan de aseno ke rayedarê Îranî ser o bandor kerdo ke kamcîn koçberî do bierşawîyê Îran û wezîfedaranê ICE’yî waştişê Tehranî ser o lîsteyanê îxracî de bedelnayîşê deqeya peyêne kerdî. E-posteyêk de rayedarêkê ICE’yî vato ke ey teyareya verêne rê "ser waştişê Sefaretê Îranî çend dosyayî zêde kerdî". E-posteyêkê bînî de zî no vajîyayo: "Îranî waşt ke ez lîsteya raywîyan a verêne rast bikera û ravêrê îxracî lez bikera."
E-posteyê 26ê Êlule ra gore, roja ke teyare perra, ê rojî de zî waştişê Îranî dewam kerdî la nê waştişî dima hetê ICE’yî ra ameyî red kerdene.
Hemkarî wextê şerî de zî dewam kerd
E-posteyan de aseno ke hezîrana 2025î de cengê 12 rojan yê mîyanê DYA-Îsraîl û Îranî de zî, kordînasyonê teyareyanê îxracî seba ICE’yî babetêka zehf muhîm bîya.
Nê e-posteyî, Şorişê Îslamî yê 1979î ra nat polîtîkaya DYA ya qebulkerdişê muxalîf û surgunanê Îranî ra dûrîkewtişêkê eşkerayî mojnenê ra. Wezareta Asayîşê Zereyî ya DYA (DHS) derheqê nê e-posteyan de hema verpers nêdayo persan.
