DYA û Erebistanê Seudî peymana nukleere îmza kerde
Wezaretê Enerjîyî yê DYA (Dewletê Yewbîyayeyî yê Amerîka) eşkera kerd ke Erebistanê Seudî reyde peymana "hemkarîya nukleera aştîyane" û peymana "tevdîranê asayîşî yê dualîyan" a ke na peymane rê rayberîye kena, ameyê îmzakerdene.
Bi hawayo fermî ame eşkerakerdene ke mîyanê Wezîrê Enerjîyî yê DYA Chris Wright û Wezîrê Enerjîyî yê Erebistanê Seudî Prens Ebdulazîz bîn Selmanî de peymana "hemkarîya nukleera aştîyane" ya ke zey "Peymana 123" yêna zanayene û peymana "tevdîranê asayîşî yê dihetan" ameyê îmzakerdene. Eşkeraya nuştekî ya Wezaretê Enerjîyî yê DYA de ame vatene ke peymanê ke behsê înan beno "vergirewtişê vilaşîyayîşê sîlahanê nukleeran zî tede, do tewir bi tewir hedefanê ekonomîk û stratejîkan aver berê" û do bingeyê qanûnî yê yew hemkarîya bi mîlyaran dolarî ya ke do bi desan serrî dewam bikera, awan bikerê.
Eşkerakerdiş de ame vatene, "Peymana 123, bernameyê enerjîya nukleere yê Seudî de yew îmkano gird yê resayîşî dana şîrketanê Amerîka û bi nê hawayî hem endustrîya Amerîka, xebatkaran û zîncîranê tedarîkî rê feyde dana hem zî seba cewabdayîşê îhtîyacanê enerjî yê Erebistanê Seudî rê do ardimkar ba."
Ame îdîakerdene ke peymanê ke ameyê îmzakerdene bi pawitişê standardanê berzan yê babeta "asayîşê nukleerî, emnîyet û vergiritişê vilaşîyayîşê sîlahanê nukleeran" û bi xurtkerdişê "avantajê rekabetî yê teknolojîya nukleere ya sîvîle" ya DYA, do paştî bidê asayîşê herême û pozîsyonê DYA. Eşkera de ame zanayene ke "Ronesansê nukleerî yê DYA dest pêkerdo," û ame îdîakerdene ke no do "şarê Amerîka û Seudî rê feydeyanê demdergan bido."
