DYA ra Îran rê hêrişo newe: 8 leşkerê Îranî merdî
Dima eşkerayîyê Trumpî; DYA’yî Îran ser o pey-pey hêrişê hewayî viraştî. Çapemenîya Îranî xeber daye ke şaristananê Bender Abbas û Sîrîkî yê eyaletê Hurmuzganî de vengê teqayîşan ameyê eşnawitene. Hêrişê hewayî yê verba tesîsanê leşkerîyan de 8 leşkerê Îranî merdî.
Dima ke Serekê ABDyî Donald Trumpî Îran bi hêrişî tehdît kerd, bombevarano ke artêşa DYA’yî saetanê şewî de da destpêkerdene, herêmê Îranî yê nêzdîyê Tengava Hurmuzî kerdî hedef.
“Adirbest qedîya, ez nêwazena muzakere bikera”
Goreyê ajansê xeberan ê fermî ya Îranî IRNA’yî, hêrişanê peyênan ê DYA’yî yê verba şaristananê Buşehr û Benderabbasî yê başûrê Îranî de 8 leşkeran merdî. Ame vatene ke leşkerê ke merdî, mensubê quwetanê Hewa û Deryayî yê Artêşa Îranî yê.
Îran: Hêrişê bêverpers nêmanenê
Ajansê Xeberan ê Farsî ya nêm-fermî ya Îranî zî nuşt ke başûrê Îranî de vengê teqayîşan ameyê eşnawitene. Ame dîyarkerdene ke şaristananê Sîrîk û Bender Abbasî yê eyaletê Hurmuzganî û şaristananê Çabahar û Kunarekî yê eyaletê Sîstan û Belucistanî de vengê teqayîşan ameyê eşnawitene.
Garîbabadîyo ke televîzyonê dewlete yê Îranî rê qisey kerd, hêrişê DYA’yî ercnayî. Garîbabadîyî vat ke DYA’yî mutabaqato ke 14ê Hezîrane de bi mîyankarîya Pakîstanî ameyo viraştene nêardi ca û dîyar kerd ke goreyê zabitnameyê mutabaqatî ganî hetî qademe bi qademe aver şirê.
Garîbabadîyî dîqet ant eşkerayîyanê Serekê DYA’yî Donald Trumpî yê ke heqaretî tede estê ser û wina vat: “Eşkerayîyê ey ê ke ewro heqaretkerdişê miletê Îranî ra heta tehdîtkerdişê hêrişî resenê, nîşanê otorîteyî nîyê; îtîrafê binameyîşê sîyasetêko ke bi serran o xo dano hêz, ambargo û tehdîtan ser û nêeşkayo neteweya Îranî bido çokdayene yo. Ganî ma Trumpê sûcdar û kiştoxî de bi ziwanê ey qisey bikerê û zey ke aseno o ziwanê hêzî ra hîna rind fam keno.”
Garîbabadîyî vat: “Çalakîyê peyênî yê ABDyî bêverpers nêmanenê.”
Xeylê şaristanan de vengê teqayîşan
Goreyê xebera T24’î ke xo daya çapemenîya Îranî ser, ame dîyarkerdene ke şaristananê Sîrîk, Bender Abbas, Çabahar û Kunarekî de vengê teqayîşan ameyê eşnawitene. Dema ke ame eşkerakerdene ke şarapnel kewto Nêweşxaneyê Îmam Elîyî yê şaristanê Çabaharî, tayê qismanê şaristanî de ceyranî zî birîyayî. Serekê DYA’yî Donald Trumpî eşkerayîya xo ya kombîyayîşê NATO’yî de dîyar kerd ke Îranî Tengava Hurmuzî de gemîyê tîcarîyî kerdê hedef û vat: “Bi îhtîmalo pîl emşo ma do Îranî bi hawayêko zaf sert bidiqirnê.” Çend saetî dima ke Trumpî na eşkerayîye daye, artêşa DYA’yî eşkera kerd ke bi baxaneya “keştîyê tîcarîyî kerdê hedef” înan verba Îranî de hêrişê neweyî dayê destpêkerdene.
Eşkerayîye de ame vatene: “DYA, Îranî verba hêrişkarîya neheqe ya dema peyêne de ya vera keştîyanê tîcarîyan û muretebatê sîvîlî berpirsîyar vîneno.” Axiosî zî nuşt ke mîyanê hedefanê artêşa DYA’yî de radarê qeraxî yê leşkerî yê Îranî, mewzîyê fuzeyanê gemî-şiknitoxan û sîstemê pawitişê hewayî zî ca genê.
