Dr. Sadiq Şerefkendî: Tarîxê kurdan de yew qetlîamo sîyasî
17ê Êlula 1992yî de paytextê Almanya ya Berlînî de, Serekê Pêroyî yê PDK-Î Dr. Sadiq Şerefkendî û hîrê embazê ey restorantê Mîkonosî de hetê ajananê dewleta Îranî ra ameyî qetilkerdene. No suîkast tarîxê kurdan de bîyo yew lerzêko gird. Bi dewaya (mehkemeya) Mîkonosî ke bi serran dewam kerd, dadgehanê mîyanneteweyîyan îsbat kerd ke fermana nê qetlîamî raşteraşt rayberîya tewr berze ya dewleta Îranî ra ameya.
Roja 17ê Êlula serra 1992yî, tarîxê şarê kurdî de sey yew roja sîyaye yena zanayene. O wext, paytextê Almanya ya Berlînî de, restorantêko yunanî yê bi nameyê ‘Mîkonos’î de yew kombîyayîşo muhîm ameyêne kerdene. Nê kombîyayîşî de sîyasetmedarê kurdî yê ercîyayeyî; Serekê Pêroyî yê Partîya Demokratîka Kurdistanê Îranî (PDK-Î) Dr. Sadiq Şerefkendî, nûnerê PDK-Î yê Ewropa Fettah Ebdulî (Fattah Abdoli), nûnerê Almanya Homayun Erdalan (Homayoun Ardalan) û açarnayox Nurî Dêhkordî ameybî têhet. O wext, tîmêkê kîştoxan yê girêdayeyê dewleta Îranî nişkay ra eşt restorantî ser. Bi çekanê otomatîkan ra, nê çar welatperwerê kurdî hetê nê ajanan ra ameyî qetilkerdene.
Zana û zîrek bi
Dr. Sadiq Şerefkendî, sîyasetmedar û roşnvîrêko zaf zana û zîrek bi. O, heman wextî de birayê nuştox, tarîxnas û şaîrê namdarî yê kurdan Hejarî (Ebdurehman Şerefkendî) bi. Dima ke serekê verênî yê PDK-Î Dr. Ebdurehman Qasimlo serra 1989î de paytextê Awusturya Vîyana de bi eynî metodî, yanî hetê ajananê Îranî ra ameybî qetilkerdene, Dr. Sadiq Şerefkendî barê serekîye û rayberîye girewtbî xo ser. Armancê ey o bi ke xebata dîplomasîyê kurdan bikero xurt, heqanê şarê kurdî bîyaro ca û sîstemêko demokratîk Îran de ronîyo. Labelê, rejîmê Îranî nêwaştêne ke vengê kurdan bireso mîyanê dewletanê Ewropa. Coka bi planke, Şerefkendî û embazê ey sey hedef weçînayî.
No suîkas karê şexsî nîyo
Qetlîamê Mîkonosî tenya yew kîşîyayîş nêbi; no serebût ra dima tarîxê huqûqî yê Ewropa de zî yew dewaya dîrokî dest pêkerd. Dewayê Mîkonosî bi serran dadgehanê Almanya de dewam kerd. Dewleta Almanya, polîs û sîstemê ci yê edaletî, bi delîlanê qetîyan îsbat kerd ke no suîkast qet yew karê şexsî yan zî yew gruba cîya nîyo. Mehkemeya Almanya qerarê xo yê tarîxî eşt war û da zanayene ke fermana nê qetlîamî rasterast Tehran ra, yanî rayberîya tewr berze ya Komara Îslamî ya Îranî ra ameya. Mehkeme, serokkomarê wextî yê Îranî Haşimî Refsancanî, rayberê dînî yê tewr berzî Elî Hamaney û wezîrê îstîxbaratî sey berpirsîyarê dîrektî yê nê qetlîamî îlan kerdî. No qerar, seranserê dinya de kerd ke rîyê dewleta Îranî yê kîştoxî û terorîstî eşkera bibo. Welatê Ewropa wîjdanê xo de no terorê dewlete mehkum kerd û têkilîyê dîplomatîkî yê bi Îranî bi mengan bîyî qut.
Hema zî teze yo
Ewro, serra qetlîamê Mîkonosî ra bi desan serrî derbas bîyê. Labelê dej û tesîrê nê kîşîyayîşî vîrê şarê kurdî de hema zî teze yo. Dr. Sadiq Şerefkendî û embazê ey, xebat û têkoşînê xo yê seba azadîya Kurdistanî de bîyî qurbanîyê terorê dewlete. Suîkastê Mîkonosî, tarîxê sîyasî de sey yew belgeyê zilmê rejîman û heman wextî de sey sembolê heqdarîya dewaya kurdan ca girewto. Vîrameyîşê înan, ewro zî rayanê xoverdayîşê şarê kurdî roşnî keno.
