Dorpêçê Kobanî û xoverdayîşo tarîxî
Aşma Êlule ya 2014î de, wexto ke çeteyanê DAIŞ’î hêrişê Kantona Kobanî kerd, bi se hezaran merdimî mecbur mendî ke warê xo biteriknê û bişirê sînorê Vakurî. No hêriş û no koço pîl, tarîxê kurdan de bîyo birîneka xorîne. Xoverdayîşê şervananê YPG û YPJ’yî rûmetê merdimeyîye xelisna, la jano ke a roje ra mendo, ewro zî zerrîya şarî de hîna taze yo.
Aşma Êlule ya serra 2014î de, tarîxê Rojawanî û cografyaya Rojhilatê Mîyanênî de rîpelo tewr sîya abîyê. Çeteyanê DAIŞ’î bi çekanê giran û bi hovîtîyêka pîle hêrişê Kantona Kobanî kerd. 24ê Êlule û rojê ke dormaleyê nê tarîxî de bîyî, dorpêçê Kobanî zaf bî teng. Çeteyan bi seyan dewanê Kobanî îşxal kerdî û resayî heta merkezê şaristanî. Şarê Kobanî; cinîyî, domanî, extîyarî pêro têdîya mîyanê yew agiro pîl û xedar de mendî. Na rewşe, merdimeyîye rê zî îmtîhanêko pîl û giran bi. Kesê ke nêeşkayêne xo bipawê û çek bîgêrê, mecbûr mendî ke rayîrê koçerîye bîgêrê û keyeyanê xo ca verdê.
Wexto ke çeteyî ameyî nêzdîyê merkezê şaristanî, bi se hezaran kobanîyijî mecbur mendî ke welatê xo biteriknê. Înan verê xo da sînorê Vakurê Kurdîstanî. O koço pîl, şinayîşê înan, mecbûrîya multecîbîyayîşî... Nê pêro, dîmenanê zaf trajîkan vetî werte. Pîyê ke domanên xo kerdî xo vîl, cinîyê ke lîlikê xo girewtî hembêzê xo û biryayî, pê linganê rût û veyşan remayî... Sînoran de asayîşêk o wina vîrazîya ke, kes nêeşkayêne bêveng bimano. Şarê Vakurî sînorî wedaritî û wayîrê birayanê xo yê Kobanî vejîya. No koç, tenya yew ca vurnayîş nêbi; no, perçekerdişê yew cuye û perçekerdişê yew tarîxî bi.
La na tarîtîye û bêhêvîye mîyan de, yew roşnayîyêka pîle zî vejîya. Şervananê YPG û YPJ’yî, kuçeyanê Kobanî de yew xoverdayîşo tarîxî da destpêkerdiş. Şervananê kurdan, bi îmkananê tay û kêmîyan, vera yew hêzo tarî û barbar de şerêkê bêeman kerd. Xoverdayîşê Kobanî, bi rojan û aşman dewam kerd û vengê nê xoverdayîşî heme dinya de ame eşnawitiş. Dinya pêro dî ke senî şarêk semedê azadîya xo û rûmetê xo giyanê xo feda keno. Taybetî xoverdayîşê cinîyanê kurdan, pêro dinya rê bî yew sembolê cesaretî û azadîye. Xoverdayîş bi serkewte, DAIŞ şikîya la bedelê ci zaf giran bi.
Ewro, serra 2014î ser o serrî vîyartî. Kobanî DAIŞ’î ra ame pakkerdiş, şaristan reyna azad bi û reyna nêfes girewt. La o jano ke Êlula 2014î de dest pêkerd, hema zî qedîyayo? Nêqedîyayo. O koç, a xedarîye, o ters û ê vîndîbîyayîşî, hema zî bîrê şarî de, zerrîya dayîkan de weş ê. Domanê ke o wext qij bîyî, ewro bi derd û trawmayê ê rojan bîyî pîl. Merdimê ke keyeyanê xo ra, eqrebayanê xo ra bîyî dûrî, hema zî hesretêka xorîne oncenê. Şaristan ame awankerdiş, banî newe ra vîrazîyayî, la birînê zerrîye hîna zî dewayê xo wazenê. Kobanî, ma rê mojna ke şarêk çi qas jan bionco zî, bi xoverdayîş eşkeno xo newe ra biafirno; la qet nêeşkeno ê rojê tarîyî û ê janê pîlî xo vîr a bikero. Tarîx no dêjê xo vîra nêkerd û nêkeno.
