Domanê ke şinê kurse: Zone ma qeseke, zone ma wes o
Komeleya Elewîyan a Demokratîke (DAD), seba ke lehçeya kirmackî bida neslanê ameyoxan rê, atolyeyêk da destpêkerdene. Mamoste Hasan Ali Kiliçî va: "Gereka ma nê mîrasî biverdê domananê xo."
DAD, seba ke Dêrsim de kirmanckî biciwîyo û cuye de bêro qeseykerdene, domanan rê atolyeya ziwanê dayîke viraşta. Kirmanckî, Atlasê Ziwananê Binê Tehlûkeyî yê UNESCO’yî de mîyanê ziwananê ke vîndî benê de ca gêna. Vîrabîyayîşê kirmanckî hem asîmîlasyon hem zî vîndîbîyayîşê kulturî zî ano. Domanê ke şinê kurse vatî: "Zone ma qeseke, zone ma wes o"
Atolyeya ke seba 6-13 serrîyan yena viraştene tede wendiş, nuştiş û qeseykerdişî yenê dayene. Atolye Merkezê DAD’î de heta peynîya aşma Tebaxe, rojanê Dişeme û Çarşemeyî saete 10.00 de bena. Qeydê atolyeyî dewam kenê.
Hemserekê Komeleya Kultur û Paştdayîşî ya Dêrsimî ya Îzmîrî Hasan Ali Kiliçî şarî rê veng da ke tewrê atolyeyî bibê.
‘Na kêmanîya ma pêroyînan a’
Kiliçî va: "Felsefeya Rêya Heqî nê erdî de vejîyaya û pilanê ma ra ma rê menda. Ma eşkenê na felsefe tewr weş ziwanê xo de bidê ciwîyayene. Serra peyênan de ziwanê ma kêm qesey beno. No kêmasî yê ma yo. Ma domananê xo reyde kirmanckî qesey nêkenê. Coka ma wazenê wextê tatîlî de ziwanê dayîke bimusnê înan. No mîras wezîfeyê ma yo ke ma biverdê domananê xo."
‘Keye de ziwanê dayîke qisey bikerê’
Kiliçî wina va, "Domanî bi keyf ameyî derse. Ziwan, nasname û kultur o. Eke ziwan nêbo, nasname vîndî beno. Ma tarîx û bawerîya xo bi ziwanê xo danê ciwîyayene. Kirmanckî ma rê zaf muhîm a. Domanê ma sey tîjî yê. Roja verêne de mi alfabeya ma musnaye û zaf weşê înan şîy. Coka wa her kes keyeyê xo de ziwanê dayîke qesey bikero."
Domanê ke ameyî kurse zî vatî: "Zone ma qeseke, zone ma weso (Ziwanê ma qesey bikerê, ziwanê ma weş o)."
Çime: Ajansê Mezopotamyayî
