Dima Hûrmuzî Babu’l Mendeb de zî şer
Bi giredîyayîşê şerê Îranî, Yemen de pêkewtişî dewam kenê. Hûsîyê ke hetê Îranî ra paştî dîyenê, wazenê qeraxanê Tengava Babu’l Mendebî bivisnê destê xo. Hêrişê înan ê vera Erebîstanê Siûdî domnenê. Erebîstanê Siûdî zî pê hêrişanê hewayî Hûsîyî dayî piro. Pakistan ra zî derheqê Pêkerdişê Meka de eşkerayîyêk ameye.
Nê rojanê peyênan de mîyanê hukmatê Yemenî yê paştgira Siûdî û mîlîsanê Hûsîyan ê paştgira Îranî de şer zêdîya. Adirbirnayîşo ke 2022 de bi mabênkarîya Neteweyanê Yewbîyayeyan (NY) amebi kerdene hema zî şiknayene yo.
Goreyê Reutersî, Hûsîyî kontrolê Tengava Babu’l Mendebî rê ke rayîrêko muhîm ê dinya yo, nêzdî bîyê. Mîlîsê Hûsîyan şaristananê zey Mocha û Dhubabî yê dormeyê tengava girewtî xo dest. Padayîşê na tengava, dima padayîşê Tengava Hûrmuzî, eşkeno Erebîstanê Siûdî rayîranê bazirganîye ra bivisno teber.
Bi desan kesî merdî
Hûsîyan da zanayene ke Erebîstanê Siûdî hêrişê wîlayetanê zey Yaf, Marib, Saada û Taîzî kerdo. Goreyê Ajansê Saba, 40 hêrişanê hewayî yê Siûdî de 100 ra zêde kesî merdî. Erebîstanê Siûdî no nêtesdîq kerd. Koalîsyonê Siûdî zî 8ê Êlulî de vat ke hêrişê Hûsîyan de başûrê Erebîstanê Siûdî de 73 kesî birîndar bîyê.
Pakistan ra eşkerayîya Meka
Verfekê Wezaretê Karanê Teberî yê Pakistanî Seccad Hayder Khanî vat ke vera hêrişanê Hûsîyan, çarçeweya Pêkerdişê Meka de seba verperso leşkerî pêvînayîş nêbîyo la "wextê ci bêro" do gamî bêrê eştene. Seba peymanê pawitişî yê Tirkîya û Siûdî zî Khanî vat: "Nika yew babeta wîna çin a, wextê ci de ma do goreyê pêkerdişî têbigêrê."
Pêkerdişo ke 7ê Tebaxe de ame îmzakerdene, vano ke hêrişê vera yew welatî, zey hêrişê vera hîrê welatan yeno qebulkerdene.
