‘Di meha Îlonê de herî kêm 226 karkeran jiyana xwe ji dest da’
ÎSÎG rapora cinayetên kar a meha Îlonê eşkere kir; li gorî daneyan, tenê di meha Îlonê de herî kêm 226 karkeran ku di nav wan de 21 jin, 8 zarok û 14 penaber hene jiyana xwe ji dest dane û jimara kesên di 9 mehan de can dane gihiştiye 1736 kesan.
Meclisa Tenduristiya Karkeran û Ewlehiya Kar (ÎSÎG), rapora xwe ya têkildarî cinayetên kar a meha Îlonê bi raya giştî re parve kir. Li gorî raporê, ji ber nebûna mercên ewlehiyê û polîtîkayên qazancê yên li ser pişta kedkaran, komkujiya li cihên kar bêyî navber berdewam dike.
Di neh mehan de hezar û 736 karker hatin qetilkirin
Li gorî daneyên ÎSÎGê, tenê di meha Îlonê de herî kêm 226 kedkaran di cinayetên kar de jiyana xwe ji dest da. Bi van hejmarên dawî re, bîlançoya reş a 9 mehên ewil ên salê gihîşt herî kêm 1736 kedkaran. Hat ragihandin ku ji 226 karkerên di Îlonê de can dane, 21 jê jin û 205 jê jî mêr in.
Zarok û karkerên koçber di bin xetereyê de ne
Raporê bal kişand ser bikaranîna keda zarokan û bêewlehiya penaberan jî. Li gorî tespîtan, di meha Îlonê de 8 karkerên zarok û 14 karkerên koçber di dema xebatê de can dane.
Sektorên herî bi xetere: Înşaet û cotkarî
Di raporê de dabeşkirina mirina karkeran a li gorî kargeh û karsazan wiha hat rêzkirin:
*Înşaet: 50 karker
*Cotkarî/Daristan: 45 karker
*Veguhestin (barhilgirî): 28 karker
*Karên şaredariyê: 16 karker
*Tersxane û qada gemiyan: 15 karker
ÎSÎGê destnîşan kir ku heta berpirsyar neyên darizandin û tevdîrên mayinde yên ewlehiya karkeran neyên girtin, ev cinayet wê bidomin.
