DFG: Aşma êlule de 8 rojnamegerî ameyî tepiştene
DFG’yî raporê binpakerdişê heqanê rojnamegeran ê aşma êlule eşkera kerd. Goreyê raporî, aşma êlule de 8 rojnamegerî ameyî tepiştene, resayîşê 3 hezar û 491 muhtewayanê medyaya dîjîtale ame astengkerdene û zaf hesabî ameyî girewtene.
Komeleya Rojnamegeran a Dîcle Firatî (DFG) raporê xo yê aşma êlule eşkera kerd. DFG dîyar kerd ke resayîşê 3 hezar û 491 muhtewayanê dîjîtalan, 15 xeberan û 4 keyepelanê înternetî ame astengkerdene.
Goreyê raporî, hesab yan keyepelê dezgehanê medya yê sey JINNEWS, Ajansê Mezopotamyayî, Ajansê Welatî, Evrensel, Kisa Dalga û T24 rastê astengkerdişî ameyî. Tena 24ê êlule de tewr kêmî 250 hesabê X’î ameyî astengkerdene. Çarçewaya tehqîqatê Narîn Gurane de 99 hesabî, badê hêrişê dibistanêkê Turgutluyî ser o zî 92 hesabî ameyî astengkerdene.
DFG dîyar kerd ke Instagramî hesabê tirkî yê Ajansê Mezopotamyayî û JINNEWS girewtî. Hesabê Instagramî yê Ajansê Welatî “ajansawelat1” zî hetê BTK’yî ra ame astengkerdene; no hesab bi kirdkî û kirmanckî weşan kerdêne. DFG’yî vat: “Tirkîya de astengkerdişê resayîşî bîyo hacetêko sereke yê teda. Astengkerdiş eynî wext de mudaxeleyêk o ke heqê agahdarbîyayîşê komelî ser o yeno kerdene.”
Goreyê raporî, aşma êlule de 15 rojnamegerî ameyî destbendkerdene û 8 rojnamegerî ameyî tepiştene. Keyeyê 4 rojnamegeran ameyî sereştene, 3 rojnamegerî ameyî tehdîtkerdene û 5 hadîseyan de taqîbkerdişê xeberan ame astengkerdene. Derheqê 10 rojnamegeran de dewa ameye akerdene û 25 dosyayan de 80 rojnamegerî yenê dariznayîş. Heta 4ê teşrîna verêne ya 2026î hûmara rojnamegeranê tepişteyan 29 a.
Rojnamegere Oya Lale Arslan seba parekerdişanê medyaya dîjîtale û weşananê YouTubeyî, Selahattîn Gunday seba dîmenanê tehqîqatê Kaşîf Kozînogluyî, Tugba Tekerek seba xeberêka Kaos GL’yî û Mudirê Weşanî yê Pêroyî yê Bolu Gundemî Huseyîn Aykan zî seba xeberêk ameyî tepiştene. Muxabîra ETHA Zuleyha Muldur zî bi 6 serre û 3 aşmanê hepsî ameye mehkûmkerdene.
