‘Dewlete bi vatişê ‘terorî’ cebheyê zereyî pêt nêkena’

Endama Koordînasyonê PAJK’î Evîndare Ararate beşdarê Bernameyê Xasî yê Stêrk TV’yî bîye. Evîndar Ararate derheqê Komployê Mîyanneteweyî yê vera Rayberê Şarê Kurdî Abdullah Ocalanî û averşîyayîşanê Ravêrê Aştî û Komelê Demokratîkî de qisey kerd.

Evîndar Ararate şehîdê teşrîna verêne, Nagîhane Akarsel, Gurbetellî Ersoz, Gulnaze Karataş (Bêrîtan), Rojîne Gewda û Arîne Mîrkan, ardî vîrî. Evîndare Ararat dîyar kerd ke nê şehîdan estbîyayîşê şarê kurdan mojna. Goreyê aye, înan hawayêk de ke tarîxê kurdan û cinîyan ame nimitene û înkarkerdene, tarîxê cinîyan newe ra nuşt û kerd mîrasê pêroyî yê cinîyanê dinya.

Evîndar Ararate bale ante ke komplo 9ê teşrîna verêne ya 1998î de bi vetişê Rayberê Şarê Kurdî Abdullah Ocalanî yê Sûrîye ra dest pêkerd. Goreyê Evîndar Ararate, sîstemê kapîtalîstî polîtîkayanê xo pêkewtişanê mezhebî û neteweyî ser o ronayî, Rayberê Şarê Kurdî Abdullah Ocalanî zî vera naye yewîya şaran esas girewte. Evîndar Ararate vat ke hêzê herêmî, dînamîkê dewleta Tirke û hêzê hegemonî nêwazenê ke şarê kurdî statuyêkê huqûqî û sîyasî bigîro, coka Rayberê Şarê Kurdî Abdullah Ocalanî hema zî sîstemê Îmraliyî de esîr o.

Evîndar Ararate bale ante ke xetereyê komployî bi hemleyanê neweyan dewam keno û vat: “Komplo pûç bi, la heta ke Rayber Apo fîzîkî azad nêbo û statuyê şarê kurdî heme parçeyanê Kurdîstanî de garantî nêbo, zemînê komployê neweyan do dewam akero. Ganî ma seba azadîya fîzîkî ya Rayber Apoyî û statuyê şarê kurdî têkoşînê xo bê vindertiş, hîna radîkal û hîna xurt bidomnê.”

Evîndar Ararate dîyar kerd ke tena înan û Rayberîye gamê stratejîkî eştî, la dewlete hema zî ziwanê “terorî” xebitnena. Evîndare Ararate wina vat: “Dewlete gamê stratejîkî nêeştî, tena wext vîyarnena. Eke dewleta tirke wazena cebheyê xo ya zereyî pêt bikero, no bi vatişê ‘terorî’ nêbeno. Pêtkerdişê cebhe îtîfaqê şaran û komelî yo, demokratîkbîyayîşê Tirkîya yo. Heta ke şertê Rayber Apoyî nêvurîyê, eştişê gamanê bînan seba ma mumkun nîyo.”