Derheqê gardiyanê kampê Nazîyan ê 105 serreyî de tehqîqat
Derheqê gardiyanêko verên yê ke ame tespîtkerdene yewê kampanê hêsîranê şerî yê tewr pîlan ê Almanyaya Nazîyan Stalag 326î de wezîfe kerdo de, bi îdîaya “hetkarîya kiştişê komkî” ya seba merdişê bi hezaran hêsîranê kampî, tehqîqat dîya destpêkerdene.
Almanya de Dozgerîya Dortmundî, derheqê yew keso ke ame tespîtkerdene dewrê Nazîyan de kampê hêsîranê şerî Stalag 326î de gardiyanîye kerda de, bi sûcdarkerdişê “hetkarîya kiştişê komkî” tehqîqat rayra bena. Ame vatene ke no tehqîqat, nimûneyanê peyênan ra yewo ke mojneno cîyayetê ke dewrê Nazîyan de ameyê kerdene ser ra bi desan serrî vîyartê zî, derheqê faîl û berpirsîyaran de ravêrê edlîyî dewam kenê. Dosya menga adare de ameye akerdene û seba selahîyetê herêmî, yewîneya merkezî ya Ludwigsburgî yê ke cîyayetanê Nazîyan cigêreno ra, dewrê Dozgerîya Dortmundî bîye.
Goreyê xebere ke rojnameyê Yeni Ozgur Polîtîka de ca girewta, Dozgerîya Dortmundî derheqê yew gardiyano bîn o ke ame tespîtkerdene eynî kamp de wezîfe kerdo de zî tehqîqat rayra berd. Labelê keso ke qala ci bena tay aşmî verê cû 99 serreyîya xo de wefat kerd.
Kamp de nêzdîyê 200 hezar êsîrî estbîyê
Stalag 326 VI K Senne, tewr pîlê kampanê hêsîranê şerî ra yew bi ke serranê 1941-1945î mîyan de hetê Almanyaya Nazîyan ra ameyêne xebitnayene. Têhmîn beno ke kampê nêzdîyê Stukenbrockî de mabênê 180 hezar heta 200 hezar hêsîrê şerî tepişîyayî. Heto yew ra qismêko pîl ê hêsîran leşkeranê Artêşa Sûre ya Sovyetan ra pêk ameyêne, heto bîn ra hêsîrê şerî yê ke Fransa, Polonya, Sirbistan, Îtalya û Belçîka ra ameyî ardene zî kamp de ameyî tepiştene.
Kampê Stalag 326î
Yeno vatene ke hêsîrî maruzê şertanê xebate yê giranan û muameleyo xirab mendî, xeylê kesî kamp de wefat kerdî. Almanya de tehqîqatê derheqê dewrê Nazîyan, rîyê merdişê qismêko pîl ê şikdaran ra nika tay yenê rayraberdene. Pê nê zî serranê peyênan de derheqê wezîfedarên kampê arêdayîşî yê verênan de zî dewayî ameyî akerdene.
Huqûqê Almanya de sûcanê kiştiş û iştîraqê kiştişî de waxtvîyartî (demborî/zamanaşımı) çin o. Dozgerîya Dortmundî, tehqîqatanê derheqê sûcanê dewrê Nazîyan yê Nordrhein-Westfalenî de rolo merkezî gêna.
