DEM Partî: Kongreya 6ê Êlule de do startê newe ra awankerdişî bidîyo

Verfeka DEM Partîye Ayşegule Dogane derheqê serebûtanê rojdemî de merkezê pêroyî yê partîye de eşkerayîyêke daye. Dogan ard ziwan ke înan qanûno çarçiweyî kombîyayîşê Heyetê Rayberîya Merkezî (MYK) de zî erjnayo û wina va: “Tarîxê Tirkîya de reya yewine qanûnêko wina ame amadekerdene. Dima ke bi rojan muzakere û ercnayîşî ameyî kerdene, o qanûn ame amadekerdene. Netîceya raydayîşêko pîl de bi 467 rayan o qanûn Heyetê Pêroyî yê Meclîsî de ame qebulkerdene û bi qanûn. Semedê ma qanûnêko muhîm bi. Reya yewine ma zî yew qanûn îmza kenê.”

Dogane destnîşan kerd ke o qanûn semedê çareserîye îmkananê huqûqîyan vejeno werte û wina va: “Bêguman no qanûn heme meseleyan rê çareserîye nêano. Ma kêmanîyanê ci rexne kenê la muhîmîya ci zî anê ziwan. Reya yewine bi hawayêko şênber ma ravêrtî merhaleyêko qanûnî. Meseleya se serran de reya yewine gamêka qanûnîye esta. Êyê ke vera ravêr de yê zî estê. Tayê vanê o ravêr dewlete keno lawaz. No ravêrêkî dayîş û girewtîşî nîyo. Nê ravêrî ra 86 mîlyon hemwelatijî îstîfade kenê. Şer û pêkewtişan teberê krîzê aborî û krîzê demokrasîyî de qet çîyêk nêard. Semedê ci zî gamê ke şerî qedênenê bi kêmanîyanê xo zî semedê ma muhîm ê. Semedê ke tu dayîke mebermo, ganî ma pêro berpirsîyarîye bigîrê. Tayê vanê o dayîşê tawîzan o. Nika rêxistine xo fesih kerda û seba huqûqîbîyayîşê na fesihkerdene qanûnêk ameyo amadekerdene. Tîya de çi tawîz esto? Tayê zî sey ke welat do parçe bibo propaganda kenê. La vera na propaganda ma qala yewbîyayîşî kenê. A game semedê xurtkerdişê ameyoxê ma ya. Ganî heme hetî pêvajoyanê bin-kewteyan ra dersan bigîrê.”

‘O qanûn semedê çareserîye zemînê huqûqî awan keno’

Dogane wina dewam kerd: “O qanûn bêguman heme pawitişanê ma nêano ca. La bi hezaran kesî do zîndanan ra vejîyê. Bi hezaran kesî do bieşkê agêrê. O qanûn wayîrê potansîyelî yo ke zemînêko huqûqî semedê çareserîye awan bikero. Rayîrê ma her tim aştî û demokrasî yo. Nika serdemêko newe dest pêkeno.”

DEM Partî do 6ê Êlule de kongre bikero

Dogane da zanayene ke ê do kongreya xo 6ê Êlule de Merkezê Kulturî yê Nazim Hîkmetî yê Enqere de bikerê û va: “A kongre do biba kongreyêka amadekerdişî ya newe ra awankerdişî. Ma do amadekarîya kombîyayîşanê şarî zî bikerê. Ma tewrbîyayîşê cinî û ciwanan zaf muhîm vînenê.”

Derheqê pêvînayîşê heyetê DEM Partîye bi Serekkomar Erdoganî, Dogane diyar kerd ke seba tetbîqkerdişê qanûnî wextêko dîyarkerde çin o û ganî tayê gamî bêrê eştene.

Dogane persa derheqê DMME’î de zî va ke ganî zû ra Demîrtaş û Yuksekdag ameyêne veradayene. Derheqê vengdayîşê Ocalanî de zî va: “Ma nêzanê do vengdayîş key û senî bibo la ganî koordînasyonan de Birêz Ocalan zî ca bigîro.”