Dayîkanê Şemeyî seba Fethî Ildirî edalet waşt
Dayîkanê/Merdimanê Şemeyî çalakîya xo ya hewteyê 1119. de waşt ke sûcdarê Fethî Ildirî ke 1993î de Hezexê Şirnexî de destbendkerdişî de ame vindîkerdene û dima bedenê ci yo bêgan bi dewsanê îşkenceya girane ame dîyene, bêrê eşkerakerdene û hukmkerdene.
Çalakîya Meydanê Galatasarayî de nêzdîyê vindîbîyayeyan, pawitoxê heqan û zaf kesî beşdar bîyî. Eşkerayîya çapemenîye endama Konseya Rayraberdişî ya Merkezî ya Komela Heqanê Merdiman (ÎHD) Erene Keskîn wende.
Keskîne vat ke bêcezatîya vindîkerdişanê bi zorî bi xo nêvejîyena meydan û mecbûrîyetê dewlete yê eşkerakerdişê heqîqet û temînkerdişê edaletî bi vîyartişê serran wedarîyayo. Aye ard ziwan ke Fethî Ildiro 18 serre êlula 1993î de seba şîyayîşê Cizîrî keye ra vejîyayo; goreyê şahidan, o hetê qoricîyanê dewa Kuştepe ya Hezexî ra ke bi nêzdîyîya xo ya Hîzbullahî yenê zanayene, ameyo destbendkerdene. Keyeyî qereqol û dozgerîyan rê muracat kerdo, la destbendkerdişê ey ameyo înkarkerdene û 19ê êlule 1993î de bedenê ey o bêgan ke dest û lingê ci bedenî ra ameybî cîyakerdene, ame dîyene.
Keskîne vat ke dosya de nameyê tayê şikbaran est bî zî tehqîqat bi serran nêame qedînayene: 2003î de bi qerarê "cigêrayîşê daîmî" ame îktîfakerdene, 2009î de keyeyî reyna muracat kerd û 2023î de dosya Serdozgerîya Komare ya Amedî rê ameye şawitene; prosesêko edlî yo tesîrdar nêame ramitene. Aye ard ziwan ke şîdet û îşkenceya ke Ildirî dîya, ganî sey sûcê vera merdimîye bêro nirxnayene û nê sûcan de vîyartişê wextî nêyeno tatbîqkerdene: "Dosyeya Fethî Ildirî de mecbûrîyetê dewlete yê tehqîqatê tesîrdar, eşkerakerdişê heqîqet û cezakerdişê sûcdaran dewam keno."
Dayîkanê Şemeyî vat ke 33 serrî vîyartî zî, ê seba Fethî Ildir û vindîbîyayeyanê bînan waştişê edaletî ra fek nêveradanê.
