Dario Azzelini: Eke şima haştî wazenê, ganî Ocalan beşêkê muzakereyan bo
Sosyologo îtalyayij Dr. Dario Azzelinî destnîşan kerd ke eke haştîyêka menda bêro waştene ganî Rayber Apo beşêkê prosesê muzakereyî bo û vat: "Keso ke wayîrê karîzma, nêzdîbîyayîşê teorîk û rayberîya ke eşkena nê prosesî biramo, Ocalan o."
Sosyolog û aktîvîsto îtalyayij Dr. Dario Azzelinî ke îmzakeranê mektûba eşkera ya mîyanneteweyî ya seba tecrîdê Rayber Apoyî û têkoşînê "heqê umûdî" ra yew o, îdîa kerd ke tecrîdê Îmraliyî tena binpaykerdişêko hiqûqî nîyo, eynî demî de mekanîzmayêko sosyopolîtîko qestikên o. Azzelinî bi xebatanê xo yê derheqê meclîsanê karkeran û modelanê xoîdareyê Amerîkaya Latînî de yeno naskerdene.
Azzelinî destnîşan kerd ke girewtişê Ocalanî û tecrîdkerdişê ci, cehdêk o seba ke çareserî mumkîn nêbo û Têgêrayîş warê mîyanneteweyî de bêîtîbar bibo. Vat ke seba komelêko zaf-neteweyî pêşnîyazê tewr tatbîqbar hetê hêzanê kurdan ra ameyî ronayene û kilîtê çareserîye zî nê modelî de yo ke herêmanê Kurdistanî de est o.
Azzelinî derheqê modelê "konfederalîzmê demokratîkî" de ke Rojawan de gandar o, vat ke demokrasî seba ke bibo demokratîke ganî her ca de cîya bo, çunke edet û struktûrê her cografya cîya xebitîyenê. Destnîşan kerd ke sey Zapatîstanê Meksîka yan hereketanê komînan ê Venezuelayî, Rojawan zî tecrubeyêko global o ke ma eşkenê pê ci yewbînan ra bimusê.
Peynî de Azzelinî derheqê têkoşînê komunan de vat ke no tena fabrîka ra nêameyo meydan, viraştişê komunan taxan de zî, seba arêbîyayîş, awa pake û binawanîye, eşkeno biqewimîyo. Veng da ke ganî însanê ke şer û îşxalî ra tesîrdar benê, xetêka têkoşînê hemparî awan bikerê: "Ganî ma destûr nêdê ke hêzê serdestî bi rojdemanê sunîyan ma parçe bikerê."
